公子L乃珠寶界名人，往瑞士蘇黎世參加鐘錶珠寶展覽，誰知瑞士唔准受SARS影響嘅香港、越南、新加坡、中國四地人士「受僱於展覽會內」（Mustnotbeemployedattheshow），十分冇癮，第二朝就飛返香港。公子L話：「瑞士人都幾巧妙，話明唔准受僱於展覽會內，即係我哋香港參展商派去嘅夥計，全部唔准開工，咁點可以賣貨呀！如果我代表公司在內做嘢，亦係『受僱』，屬於違規；但如果我做遊客，入內參觀兼買貨，就唔算係受僱，瑞士佬真係扭計扭到絕！」瑞士展覽會主辦機構話明照足世界衞生組織指示行事，唔禁止上述四地人士入境，睇怕香港話要追究都係得個追字，一定不了了之。
由於參展人多，規模太大，巴塞爾展覽會心生一計，將亞洲區展覽館移往蘇黎世，主館仍然留響巴塞爾。貿易發展局因此特別有專人到蘇黎世專心精心設計香港館，務求吸引世界各地買家，既然如此，當然使費不菲，所以俾瑞士打咗一棍，損失甚大，參展商固然激氣，貿發局亦投訴無門。公子L話香港貨與瑞士貨本來係不同產品，彼此好少互相競爭，鐘錶W話香港手錶出廠價，介乎十美元至三四十美元之間，瑞士錶出廠價在三四百美元之間，絕無市場重叠，兼且香港係瑞士錶第二大市場（第一大係美國），如果話瑞士搞貿易保護，理由唔夠充份，所以瑞士人點解要阻止港商參展？唔明。