美國人氣rap友Eminem主演嘅勵志hiphop電影《8里公路》，最近推出DVD，好識做嘅Eminem為咗幫電影公司造勢，特別將歌曲《Superman》拍成MV，重只係收錄喺隻DVD入面。既然係益班肯買DVD嘅fans，Eminem自然要玩大佢，搵埋美國AV界一姐GinaLynn拍住上，睇怕呢個MV都係Eminem出道以嚟最大膽不文嘅一個囉！
Eminem喺MV入面拖住身材惹火嘅Gina姐去酒店開房，起初佢推對方上床，重脫去上衣飛身㩒住人翻雲覆雨，但當Eminem見到Gina好似小綿羊咁容易馴服嘅癡纏樣之後，突然收掣冇興趣玩，重掟Gina出房，自己就沉迷喺更激嘅幻想入面。
喺房外嘅Gina為咗吸引Eminem，對住門口防盜眼擺出最拿手嘅銷魂摸胸動作，之後重坦蕩蕩咁騷自己本錢，不過擺到明甚寸嘅Eminem，竟然對住防盜眼拉開褲鏈，又舉起中指，之後重露出光滑嘅屁股，擺明請Gina食檸檬！傳聞Eminem拍呢個MV嗰陣，部份鏡頭用咗替身，如果真係有替身「代籮」，一定令唔少fans失望。