將軍澳寶琳邨寶仁樓二樓大堂，一旦遇上大雨天或樓上洗地，雨水污水便會倒流入二樓大堂，造成水浸，居民去年雨季開始已向管理處投訴，但至今未改善，雨季快將來臨，居民擔心二樓大堂會經常水浸，但投訴無門，只有向《蘋果》求助。
「由去年雨季開始塞渠到𠵱家，搞到個大堂成日水浸，最終佢哋竟然唔係通番個渠管，而係將條喉駁去平台就算，你話佢哋幾求其呢！」寶仁樓其中一住客陳小姐投訴稱，寶仁樓二樓大堂的去水渠位，去年七月已出現淤塞，但管理公司一直沒有妥善處理，污水倒流令二樓大堂經常水浸，對居民非常滋擾。
陳小姐憶述，水浸問題自去年雨季開始發生，「嗰排落咗好多日雨，二樓大堂經常水浸，後來知道原來係地下個去水渠位塞咗，所以啲水去唔切。」她說，居民曾向管理公司投訴，但管理公司只是每次水浸時往協助清理，一直沒有維修淤塞渠管。
直斥管理公司做法治標不治本的陳小姐稱，由去年至今，居民已多次向管理公司投訴、要求維修淤塞的去水管，但不得要領。陳小姐向記者大吐苦水，「每次落雨或者樓上洗地，二樓大堂就『食到應晒』，我每次返嚟見到咁都要清理一大輪先返到入屋，都唔明佢哋點解遲遲都唔肯去通渠。居民擔心雨季來臨，若情況持續，會令環境衞生惡化。」
陳小姐說，居民感到投訴無門，忍無可忍下向本報求助，記者跟進投訴後，管理公司「終於有做嘢」，但其做法卻令她大惑不解，管理公司近日派人「修理」去水喉管，但她後來發現，原來所謂的「維修」，只是將排水喉管鋸斷，轉駁往二樓窗外，排出窗外了事。
「將條喉駁去窗外，啲水就積晒喺個窗外平台，個平台對正咁多戶嘅窗口，積水惹嘅蚊蟲就由窗門入屋，真係唔明佢哋點樣做嘢。」陳小姐質疑有關管理公司何不將該喉管直接駁往大廈的去水渠、令居民大受滋擾。
房屋署發言人回覆，該署發現寶仁樓二樓與三樓間的去水喉「去唔切」，相信與樓齡有關，為疏導去水，於三樓至二樓間加設一條渠管，直通二樓平台，接獲本報轉介居民意見後，亦認為有需要改善，已計劃將該去水渠加長至貼近平台去水口。
（○四○八三一）
區議員區能發批評房署工程馬虎及疏忽，他指，房署為準備出售寶琳邨，目前正為屋邨各座進行更換水管工程，可能因此造成沙石令去水喉瘀塞，而在二、三樓間加裝去水管，本可改善情況，可惜房署工程馬虎，伸延至平台的去水管與去水口「重差尺幾」，污水流出時未能直接流入去水位，而引致污水「彈晒出嚟」，對居民造成困擾。
服務熱線
電話：29908288
傳真：23702192
電郵：