恒指回落11點，冇完全跟足美股下跌，乃因事前已先跌夠，不過個勢仍然唔係點得，輪到銀行股偏淡，例如恒生（011）與中銀（2388）分別下跌75仙與15仙，理由係樓價唔掂與經濟唔妥，銀行亦會受到影響。
滙豐（005）最低82.25元，收82.75元，冇升跌。外資大行睇淡銀行股，滙豐唔易有作為，可以諗吓揸啲滙豐Put輪搵食，對象有昨日所提嘅9669，加隻9616。9669喺6月夠鐘，現價38仙，溢價3.1%，槓桿率21.8倍。9616下月杪到期，現價50仙，溢價1.5%，槓桿率16.6倍。
恒指收8625，最低8559，短期內或有機會因超賣而有技術性反彈，但彈完之後，有可能再試低位。不妨細細注吼個市彈升之時，揸些少恒指Put輪，對象係9674同9619。
炒嘢最好睇兩便，若然個市唔技術性反彈，冇機會吼低價買恒指Put輪，則亦可吼恒指踩落去上次低位8500以下之時，趁低揸恒指Call輪博大市反彈，對象係9750同9767。總之𠵱家個市兩頭擺，唔適宜高價追貨。另外，窩輪愈來愈難玩，心大心細入市易唔見錢，手風唔順者不入市也罷。
章盛