港股噚日跌勢放緩，暫時獲得喘息機會，恒指全日僅跌11點，收8625，成交只有68.25億元，沽壓明顯減輕。不過，國泰（293）就似乎愈嚟愈麻煩，噚日本港機場取消31%航班，整個4月原訂航班暫時已知共減少1/3，本周六國泰會公布減少航班計劃，相信都會幾震撼。
國泰噚日繼續遭拋售，跌破9元，收報8.95元，挫2.7%，成交高達3.16億元。但阿虎見唔少中資買盤承接，唔通中資又想借機增持國泰股權？
黑客同阿虎講，國泰係亞洲區龍頭航空股，港龍拍馬都趕唔上，而且國泰最終都會進入中國市場，肥水不流別人田，中資絕對有誘因增持國泰。
噚日傳出李業廣的劈炮策略取得初步成功，迫使阿松同意先將專家建議公開諮詢，而李業廣繼續出任主席。阿松今次諗都唔諗就全盤接納專家小組建議，結果遇到強力反對，要阿董從中調停。
阿虎即刻想起之前仙股事件，阿松又係諗都唔諗就話要問責，結果鄺其志只係因為發表一份諮詢文件而被迫落台。呢個世界真係同人唔同命，有人撐腰同冇人撐腰原來分別真係咁大，政治嘅嘢，阿虎費事理咁多，不過李業廣今次成功迫阿松讓步，港交所（388）股價即刻逆市上升2.3%，收8.75元，今日重返9元都唔奇。
百江燃氣（8132）下午停牌，傳聞話公司配售可換股債券，集資5000萬美元。公司一直傾緊入股深圳燃氣項目，唔通單Deal已經傾掂咗？Cookie話，聽講批債券配售反應唔錯。
阿虎