非典型肺炎肆虐香港，導致飲食業生意勁跌，歐陽震華（Bobby）有份投資的食店「越華會」亦受牽連，他除計劃向業主要求減租外，又親自送外賣。Bobby早前更往廣州拍攝內地洗衣粉廣告賺外快。
歐陽震華年前與老友陶大宇及幾位圈外朋友，一同於筲箕灣合資開設食肆「越華會」，多年來一直生意穩定，但近期非典型肺炎在香港擴散，令全港食肆生意大幅度下跌，「越華會」亦受影響，幸而情況未算嚴重，在開源節流下，暫時也毋須要求職工放無薪假期。
Bobby日前在電話中說：「生意就梗係有影響啦，跌咗大約兩成啦，過兩日成班股東可能開會，希望減租啦，𠵱家我哋叫咗啲兼職唔使返工。以前我哋冇外賣，𠵱家就做埋，呢排我同陶大宇都唔使開工，我哋可能成為全港至正嘅外賣仔。」
雖然百業蕭條，但Bobby卻憑其健康及搞笑形象，獲內地「立白」洗衣粉廣告商青睞，早前他往廣州拍攝電視及平面廣告，據悉Bobby今次更撼低張學友、影帝級人馬葛優及在電影《英雄》飾演秦王的內地演員陳道明，以七位數字酬勞，簽下兩年合約，成為廣告代言人。
Bobby對此說：「可能廣告商覺得我啱做，價錢又適中，所以至考慮我啫，我覺得酬勞OK，夠我買層內地樓㗎啦，其實喺咁嘅市道下，算幾好㗎。」Bobby表示拍廣告時，不知非典型肺炎在當地爆發，所以他毫沒準備，留穗三天都未有戴口罩及手套，他說：「嗰時我都唔知肺炎咁恐怖，乜都冇戴到，有時啲嘢都避唔到咁多。」
採訪：朱芷瑩
