身為無綫當家花旦的葉璇（Michelle），老實說，並不是那種美豔動人的女性，反而是那種愈看愈舒服的類型，尤其一雙眼睛，就像會跟你說話一樣，不但只男性，就連女性也被迷倒。如果你都想好似佢咁電力十足，不如參考吓Michelle黐雙眼皮膠紙的電眼心得啦！
記者：羅惠芬 攝影：伍慶泉
化妝：YumiKwan 髮型：Adam（Headquarters）
場地提供：TenbyNailTech（31040730）
逢星期一至五刊出
身邊不少朋友都話，葉璇最靚的地方是一雙眼，水汪汪，好鬼精靈，連她自己也同意。「眼睛最重要是黑白分明，唔好有血絲，平日多點滋潤雙眼，望落水汪汪都吸引啲啦！」咁講法，Michelle對眼咪攞滿分！
原來她對眼部護理好講究，除了晚晚勤塗EyeCream同敷眼膜外，最特別的，原來係臨瞓前一定要貼雙眼皮膠紙！
「經過我多年的研究和試驗，發現貼膠紙可以改善雙眼皮，貼得愈耐效果愈持久。」所以𠵱家Michelle晚晚都會黏住雙眼皮膠紙瞓，日積月累下，佢話雙眼皮真係深咗！大家都不妨試試。
記得初出道時的Michelle，雖然說不上肥妹，不過身形略胖，而且面龐脹卜卜，今日身形細了一個碼，看來清減了些。「其實我從來沒有試過刻意減肥或節食，清減的原因，可能跟BabyFat消失了有關。」Michelle重話，心目中想Keep至105磅：「到時應肥的地方肥，應瘦的地方瘦就最好。」
葉璇是杭州人，皮膚保養得好，但她說小時候在家鄉都只懂飲白開水，並沒有任何護膚意識。「聽人說過杭州人飲的是地下水，有好豐富的礦物質，多飲皮膚會靚，所以皮膚一直都Keep得好滑。」
不過到香港後日日要化妝工作，加上香港沒有地下水，就算幾天生麗質，平日都要勤加護理，尤其防曬工夫她一定做足。「我好易曬黑，每次出外景我都會勁用防曬用品。最厲害一次是在日本一間藥房，買了一支高達SPF130的防曬產品。」
除了面部，葉璇亦好着重手部護理，平時會用甘油加砂糖磨手，去死皮兼可令皮膚潤滑，做完護理重會同手指扮靚靚㖭！除此她還會四出搜括心水指甲貼紙：「春、夏天最好揀花花圖案，顏色就以黃、青綠、粉紅等色為主，夠清新。」
Michelle愛研究護膚，閒來都會自製護膚品塗面。「第一次DIY，係在美國萬聖節時俾人擲雞蛋，返屋企洗頭時，發現頭髮滑溜咗，之後就一直嘗試。」其他還包括敷蛋白幫助緊膚、用檸檬汁加水洗面美白，或者用西瓜皮洗面等，都係簡單而且便宜的方法。最特別的反而在她的雪櫃內，有一格位置是專門擺放護膚用品，她說一來雪凍用夠舒服，二來可以Keep得久些，唔怕過期。
Boots27389140
RMK28106690
Covermark25040939