家姐同平時一樣諗住去健身室做Gym，阿媽就話人多驚有菌唔畀去。講真，要有效對付非典型肺炎，多做運動強健體魄一樣重要。雖則話喺屋企周身郁都算運動，不過目標明確就固然更好，睇住VCD嚟OneMoreTwoMore，就瑜伽、健身操、KeepFit運動都可以學到，甚至跟世界冠軍學耍太極，足不出戶都照樣可KeepFit健體。
記者：招佩珊 攝影：陳陶鈞
ImageKid：蔡豪軒
Model：Winnie（SunSpot）
上星期，家姐在書店的最新推介櫃枱前見到呢盒《太極之簡易太極廿四式》，由世界武術錦標賽太極金牌得主李暉教授，黃霑做主持同負責原創音樂，阿媽一定啱。結果係，呢盒本來係家姐送給阿媽的禮物，竟成了終日悶在家的兩姐弟的健康好玩意。
這套《簡易太極廿四式》是普及太極拳之一，動作都好簡單，唔算難跟，況且是以鏡面示範，換言之，睇到公仔箱裏面的李暉向邊個方向郁，只要跟住同一個方向做動作就得，唔使話見到佢向左邊郁，其實就要向右邊郁，一時又左一時又右搞錯方向跟唔上，總之，就好似照住塊鏡咁，好易學！
細路學一樣掂
不過，對於細佬來說，的確有些少難度。初頭他見李暉的身體好簡單的左右擺動，似乎不感興趣，但到了有踢腿動作就愈睇愈興奮，最後重跟埋家姐睇住電視一齊做動作，男仔頭始終是粗魯，鍾意大動作。
細佬愈玩愈興奮，周身郁唔停，雖然都算唔上太極，但當一般運動都唔錯。想不到有家姐在旁指點一下，他竟然漸漸打得有板有眼，自己望住部電視就已經可以跟住做，而且重架勢到來一招「金雞獨立」，原來是學緊「左右蹬腿」呢一式，無論大人同細路都好易上手。
要一家大細都玩得，兼又收強身健體之效的這類學習影碟種類相當多，嫌太極節奏太慢的話，練武、跳的士高一樣得！
一家大細打功夫
糅合中國武術招式於運動內，由大人同小朋友一併示範雙人動作，家長同仔女可以一齊學，況且提起打功夫，小朋友會更雀躍。
爆炸頭似落D
叫得做《DiscoSweat》，等你一邊聽《ShakeYourBody》同《GiveItUp》呢類70年代Disco音樂，一邊跳健康舞，而且示範的是個爆炸頭，爆笑之餘，肯定愈跳愈夠Fun，全家一齊玩，開心兼過癮！
這類可以在屋企跟住學的健身體操影碟，以女性為對象的就特別多，大概並非女人特別注重健康，而只是女人特別貪靚。近期人人不願出街，反而造就一眾女人有時間練出健美身段也說不定。
健康舞靚女做招徠
用明星靚女做包裝又的確比較吸引，試問去到貨架，在芸芸VCD同DVD中，有知名度兼且更係靚女級人馬自然就更有說服力，話晒都有辦你睇。好似本地就有雖然是媽媽級，但依然Keep到好Fit的黃佩霞同沈德寶莉，除了教做健美操之外，黃佩霞重會教埋你點樣飲食先至夠健康同Fit，女仔當然貪靚，所以家姐都忍唔住手買番隻。
至於外國代表就有名模CindyCrawford仙蒂歌羅馥，以及網球壇靚女AnnaKournikova安娜古妮高娃。
瑜伽近期大熱
至於近日勁Hit的瑜伽亦有好多VCD同DVD，有以初、中、高唔同級別來分，亦有專為唔同人而設的教材，例如小朋友、孕婦等，不過，佔大多數都是英語版，粵語版更少，若然聽唔明就唔好亂試，避免受傷。
店舖資料
（a） 商務印書館
地址：旺角彌敦道608號
電話：23848228
（b） 大眾
地址：旺角新世紀廣場6樓668，686-687
電話：27731509
（c） HMV
地址：尖沙嘴漢口道12號新聲大廈
電話：23020122