今次真係一沉百踩，連穆迪都調低地產股評級，再次觸發地產股洗倉潮，新地（016）一度大挫6.7%，低見34.70元，不過美國培基入市接貨，抽回35.30元收市，跌幅收窄至5.1%，成交近5億元。有消息傳出郭氏兄弟噚日入市接貨，所以股價才可在35元水平企得穩。港股在基金洗倉情況下，大跌169點，收報8636，成交明顯增加，達到83.71億元。
今次外資狂質地產股，主要是睇淡投資物業租務及住宅樓市市道。芬佬既然可以睇淡地產物業價格，當然連銀行資產質素都會睇淡埋，據聞外資已準備向銀行股郁手，當中以本地銀行如恒生（011）、中銀香港（2388）及東亞（023）為對象，至於滙豐（005）則仍要視乎外圍市況而定。
大馬噚日變相宣布唔畀香港人入境，真係唔畀面。不過，反正大馬都唔係一個好好玩嘅地方，但最怕係其他國家都跟風，唔畀香港人入境，到時港人就真係應政黨呼籲「全部留港」消費，但可惜除咗買口罩同消毒清潔劑外，留港都冇其他消費意欲。如果真係咁，國泰（293）所受打擊將更沉重，噚日再挫4.2%，收報9.20元，成交2.4億元。
肺炎潮摧毀力比股份派高息的支持力更強，佐丹奴（709）宣布派末期息連特別股息合共14.5仙，但由於本港營業額因肺炎潮而大跌20%，導致基金洗倉，股價單日挫14%，收報2元，股息率升至9.5%。
有芬佬朋友對阿虎講，基金界對肺炎潮的恐慌現時只是開始，相信重有好多芬佬仍在評估影響，暫時未正式採取行動。
阿虎