非典型肺炎未受控，染病人數有可能急升，到月底會倍增，香港經濟飽受摧殘，股市連續第2日大跌，恒指收8636，跌169點，成交83億元，沽壓頗大，期指更大低水66點。
地產股備受糟質，基金同大行由頭沽到尾，新地（016）、恒地（012）同九倉（004）都跌逾5%，睇見高盛個目標價，心都實埋，新地會見28元，即係重要跌多20%，而03年度（6月結）每股盈利亦由3.37元調低到3.2元，若真係到價，PE只係8.75倍，息率接近8厘，真係會跌到咁殘？
嘉里建設（683）亦遭拋售，大跌10%，地產股中表現最差，基金洗倉，絕不留手。不過，即使唔考慮會私有化嘅因素，跌得急者，第日反彈亦最快。
光大控股（165）發盈警，指02年（12月年結）業績會大降，主要係聯營光銀（持21.39%）同光證（49%）要增加撥備。今年1月下旬光銀宣布業績都幾好，更刺激光控升上2.5元水平，但已有熟悉內情嘅人士告知，話中港兩地會計準則唔同，光銀列入光控條數，可能同光銀內地盤數有好大出入，筆者當時亦有提出趁高回吐。
噚日上升股仍逾百隻（不計認股證），唔少基本因素佳，而又有高息支持嘅股份，有唔少實力客吸納。毅興行（1047）收0.91元，升1仙，重上3條平均線之上，走勢亦形成高低腳底部，短線阻力在0.94元的頸線水平，破位而上，可見1.1元。
毅興行主要產銷着色劑及工程塑料，03年度（6月年結）上半年，營業額4.53億元，升23%，盈利2010萬元，大升65%，每股盈利6.7仙，中期息3仙。由於內地經濟發展迅速，邊際利潤較高的着色劑及工程塑料業務，成績理想。為配合市場需求，集團全力擴產，位於上海的新廠房已於2月投產，大埔工業邨新廠短期亦可啟用，全面投產後，集團的產能將可升4成，為未來盈利增長提供保證。
全年盈利估計5200萬元，升35.3%，每股盈利17.3仙，預測PE僅5.2倍，下年度，產能增加可「催谷」盈利再大升。中期息3仙，估計末期派6仙，全年9仙，息率達10厘，值得持有。
郭兆誠