最近個市真係乏善足陳，小初真係悶到嘔咁滯，所以稍為有郁動嘅股份，小初都出力八，睇吓有冇着數。
小初噚日見隻i100（616）股價有異動，於是嗱嗱臨走去八一八，點知收番嚟嘅消息非常令人氣餒。市場傳聞隻股會步佢新阿媽永義國際（1218）後塵，玩集資遊戲，重唔排除係供股呢一招。
i100股價噚日升23.8%，收0.026元，雖然升勢凌厲，但成交就唔夠20萬元。
經紀陳話，永義先排以每股0.01元，總金額609萬元購入i100控股權，兼且提出全購。雖然作價相宜，但永義要提供3000萬元貸款俾i100。假如永義想收番貸款，一係就買入資產，然後以貸款作抵銷；又或者由i100集資。可能係永義抽水機器形象太深入民心，所以市場傳聞i100想供股集資，實在唔出奇。
經紀陳提醒小初，唔好見隻股個勢似做上，就亂追一餐。小初心諗，你當小初第一日出嚟炒股咩。
慕容小初