妮歌潔曼（NicoleKidman）嘅魅力真係不同凡響，連我羅拉呢啲靚女都自歎不如。早幾日妮歌同睇落冇乜關係嘅占基利（JimCarrey），竟然俾人發現一齊喺紐約撐枱腳，重鬼咁煙韌㖭。
講真妮歌同占爺真係大纜都扯唔埋，牽強啲講佢哋都只不過喺九五年嘅電影《蝙蝠俠不敗之謎》入面叫做合作過，但係佢哋都冇乜對手戲，況且要發展都晨早發展咗啦。不過目擊者又好言之鑿鑿咁話：「佢哋對眼淨係望住對方，重成晚摸嚟摸去，你話佢哋只係朋友就真係打死都唔信！」
不過諗深一層，佢哋傳緋聞又唔係冇可能嘅，占爺同雲妮絲惠嘉（ReneeZellweger）分手後，都冇乜固定女友，而妮歌離婚後傳過同RobbieWilliams、杜比麥奎爾（TobeyMaguire）、雲迪素（VinDiesel）同祖迪羅（JudeLaw）拍拖，𠵱家整多個占爺都唔出奇吖！