「沙士」喺外地傳播速度之快，出人意表，多倫多一片緊張，澳洲、美國都發下行政命令，強逼染上或曾接近「沙士」嘅人士，必須隔離。個病透過旅行人士傳播，而在經濟全球化之下，病毒隨住航機擴散，人間不知何處是樂土。
一啲有錢人家兼且及早警覺嘅，不立危牆之下，一於暫別香江，蘭桂坊之父盛智文以前曾受典型肺炎困擾。好注重身體保養，上個月一知道「沙士」傳到嚟香港，楊永強話：「邊度有outbreak」之時，立即飛咗去泰國布吉島小住，唔同你玩。事實證明佢反應快捷，如果到𠵱家先至去，唔會咁容易入境安居。按現時「沙士」傳播速度，恐怕香港人好快就俾其他國家「隔離」，我哋想出門都唔得，外國人亦唔會嚟，諗吓都好得人驚。求求你，董先生，重有冇好橋呀？
我哋當然亦唔倚賴政府，必須加強個人衞生，家居清潔。惡佬明做事好科學化，最近小心翼翼戴口罩出街，坐地鐵、巴士，一定企，唔坐，佢話坐低之後，如果有人居高臨下噴口水，自己就會好蝕底，戴口罩都唔掂喎，亦帶住三文治膠袋出街，套在手上作㩒𨋢、推門之用，更在屋企蒸醋。蒸醋？算唔算科學？惡佬明話：「幾位廣東省老友打電話落嚟，叫我蒸醋，我諗唔到科學解釋，不過佢哋猛勸我照做，而佢哋亦係有學識之人，冇理由點我啫，姑且照做可也。」究竟煲醋或蒸醋有無殺「沙士」病毒作用，願請教各方高明。