立法會主席范徐麗泰活躍於政界，但八方好少喺馬場碰見佢。不過，范太最近榮升馬主，同老公范尚德以及乖仔范駿華齊齊養馬，隻愛駒個名都幾特別，叫做「另具一格」（FirstAmongEquals）。
八方知道范太同乖仔係第一次養馬，但范尚德就有多年經驗，因為佢係香港高爾夫球會團體成員，現役馬「海明珠」佢都有份。
呢隻「另具一格」係兩歲新西蘭自購新馬，約值三十四萬港元，抵港後交畀今季新開倉嘅練馬師胡新訓練，一位專研究馬匹血統嘅老友講，隻馬父系擅跑泥地，「另具一格」將來在港跑泥地可能有一番成就。
范太同八方講，個馬名有得解嘅，因為喺比賽嘅起點，各馬匹都係平磅比賽，係equal嘅，但跑到終點就只有一隻跑第一，咁最好係自己隻win啦。至於中文名，就係一個老友幫手改嘅。講開又講，早前有傳聞話香港經濟差，班醫生又掛住去打SARS，所以怕唔夠人認購新馬，點知今年入紙嘅數目同舊年一樣咁多。睇嚟香港人馬照跑嘅精神不變，又係嘅，日日匿埋喺屋企驚染上肺炎，唔病死都悶死。
傳真︰2623-9278
電郵︰