前晚歐冠盃皇馬主場對曼聯，好多人都想睇吓皇馬一班球星，拍埋去曼聯一班「紅魔鬼」究竟係咪大超班；戰果就好似話咗個答案畀大家知嘞，朗拿度就更加要迫到曼聯後防用超技術至可以頂得住。
就好似佢喺上半場一次禁區內右路發難，一個假身向左後再推右想落底線，曼聯嘅布朗仔就真係要用手至阻得住佢。呢球波除咗我求大俠之外，身邊所有老友記都話肯定係十二碼，偏偏球證冇判罰，曼聯都算逃過一劫。
賽後朗拿度亦好例牌咁話冇理由唔判罰，重誇張到話呢球係佢足球生涯入面最應該獲判罰嘅十二碼㖭！咦？你咁講係咪即係話以前博到嗰啲十二碼，都係靠「插水」呃番嚟呢？
之前效力過西甲聯球隊華拉度列嘅曼聯後備門將列卡度，話碧咸早幾日問過佢西班牙嗰邊嘅教育及安排子女入讀小學嘅問題！嘿嘿，睇嚟碧咸真係好有興趣過去皇馬搵食喎！不過睇番前晚「皇曼大戰」，碧咸表現只係中下水準，而同踢相同位置嘅費高，亦搏盡去爭取表現，重有一個靚絕「士哥」㖭，睇嚟碧咸想投靠皇馬，真係要「突飛猛進」至得囉。
今屆先至降落英甲聯比賽嘅李斯特城，前晚贏咗森林一比○之後，𠵱家只差三分就可以喺來屆升返上英超聯。講真呀，我求大俠冇諗過佢哋可以咁快翻到身，𠵱家佢哋就快見到終點，證明只要肯努力就一定會成功。下屆九成九要喺英甲比賽嘅新特蘭，希望佢哋可以向李斯特城借鏡，喺○四/○五年球季返超聯同球迷
咪以為羅馬同拉素班球員淨係識得踢波，原來重有其他專長。羅馬嘅湯馬斯、迪維基奧同簡迪拿會聯同拉素嘅佩雷斯、米赫洛域同彭卡路，為周星馳嘅搞笑片《少林足球》嘅意大利版配音，加埋重要配成二十分鐘㖭。我求大俠唔知佢哋幾位之前有冇試過配音，但𠵱家做番啲同本身工作有關嘅嘢，照理應該可以交足功課。
早兩日公牛總經理卡羅斯以健康理由辭職，啲傳媒即刻大做文章，話佐敦下年大有機會回歸手執「牛」耳咁話。不過佐敦就連隨擰頭，重話搞行政嘅話巫師係不二之選。梗係啦，佐敦喺巫師搞咗幾年，都仍然係一鑊泡，好似加域布朗咁更加係激到佢血到嘔埋；家陣重要波神返公牛由頭嚟過？你估波神儍嘅咩！
逢周一至周五見報