非典型肺炎病毒一日未擊退，全港市民都會高度戒備，唔鬆懈得。呢場抗戰唔知要打到幾時，社會各階層都受影響。有一排無搞樓盤記者會嘅新地，噚日推銷將軍澳中心新優惠，代理總經理周國賢喺記者會開始前，特意講一番激勵大眾嘅說話。重向在座嘅傳媒派發一系列安全配件，包括手套，口罩同濕紙巾。
佢代表公司同個人向前線緊守崗位嘅戰士致萬二分敬意。所指係喺一直努力拼搏嘅醫務人員、處理環境衞生嘅清潔人員，同向市民報道肺炎情況嘅傳媒。
作為一個普通市民，可以做嘅嘢其實好簡單，要有「三個心」，有關心自己嘅心，同關心身邊人同親友嘅心，重有係毋須作無謂嘅擔心。佢又深信香港人係可以渡過難關嘅。蘭西心諗，咁買樓係咪要兩意呢？
香港唔知幾時戰勝病毒，但支持同忍耐，比甚麼特效藥都來得有效。
肺炎事件搞到市民唔敢外出，商場生意大受打擊。啟勝物業管理旗下嘅商場，如沙田新城市廣場（圖三）及葵芳新都會廣場等，已加緊探訪同巡視各商戶，建議佢哋要做足預防措施，四圍都貼咗有關預防肺炎嘅海報，照顧周到。
淘大花園事件，懷疑病毒係透過污水渠散播，有見及此，上個禮拜開始，啟勝管理嘅住宅，清潔範圍擴大到連廁所水箱，都加入漂白水作消毒劑，好似中半山帝景園、元朗朗庭園等，都有同樣措施，以防萬一。
令港人提心吊膽嘅非典型肺炎，最先喺沙田區爆發，理論上嗰區嘅樓市大受影響，但利嘉閣上個月最好數嘅分行，沙田第一城竟然榜上有名，而且重係亞軍㖭。
利嘉閣董事廖偉強話，該分行由楊浩賢（圖四）統領，人手約九名，都係資深員工，有幾位之前重做過主管，做番前線梗係駕輕就熟啦！佢哋主力做沙田第一城租務同買賣，同時又轉介屋苑業主購買外區住宅。
除咗沙田第一城之外，馬鞍山雅典居都係收入來源，至於一手樓最大一單就係畢架山一號。
沙田第一城分行3月份嘅佣金收入有八十萬，第一位係九龍塘分行，有一百一十三萬數。第3位係有七十幾萬數嘅將軍澳新都城分行。
工廈市道冇乜受到近期一連串嘅負面消息衝擊，中原地產工商部高級營業經理黃啟成話，最近重錄得幾單大手租務成交。
佢透露，好似葵涌嘅東方工業大廈，五樓全層1.65萬呎，由一家皮革公司以呎租兩個二承租兩年。租客將同區租用嘅三個單位集中埋一齊。
一家物流公司，早前已經喺附近租咗一幢總樓面超過十萬呎嘅工廈，𠵱家又承租東方工業大廈四樓A室8250方呎，擴充業務，呎租都兩個二。
過往市建局搞重建，一般都會惹來不少反對聲音，但今次準備搞嘅中環士丹頓街/永利街重建計劃，有意建孫中山廣場，介紹國父生平軼事，不少受重建影響居民都支持，重集體寫簽名信畀市建局，希望計劃快啲落實。簽名嘅居民有成八十個，佢哋喺嗰度經過幾十年風雨，覺得孫中山同中上環有好深厚淵源，區內只係得中山史蹟徑嚟紀念佢實在唔夠。
淘大花園E座封樓令解除，已經有反應快嘅投資者積極搵貨，噚日市場傳有財團放聲氣想大手入貨，出三十萬到五十萬撈跳樓貨。除E座，附近座別都係搜購對象。
好多投資客都相信富貴險中求，亦係趁火打劫能手，之不過今次出手就狠咗啲，假設淘大花園E座真係跌到落三十萬，睇怕成個東九龍二手市場都會被震散，長遠嚟睇對個市冇好處。
蘭西
電郵地址：
