呢次嘅非典型肺炎，真係搞到酒樓生意大跌，綜合好多酒樓負責人講法，今次肺炎爆發，令基本生意額跌咗一半以上，單就旺角區，最近兩星期內起碼有五間酒樓暫時落閘暫停營業。今次訪問嘅三間酒樓都異口同聲得出一個結論，「食品質素一定要比平時更好、價錢更平！否則又點可以吸引到只係剩番『一半』出嚟食飯衝動嘅食客呢？」
記者：朱崇德 攝影：楊錦文
ImageGirl：Irene
好似呢間$38任食火鍋，基本上大家一坐低就會送你海鮮寶船一隻！寶船款式有兩款，一為象拔蚌三文魚刺身，其二是新鮮肉蟹、生蠔、泥鯭、生蝦拼盤，小記認為最抵之處，係佢有一個海鮮魚檔水池位，全部海產類食品都係即叫即劏，絕對新鮮！
中高檔海鮮任食
呢度嘅火鍋自助餐另一特色，就係打邊爐食品「任劃任叫」，啤酒、清熱蔗水、夏枯草任飲！有啲火鍋料，重屬於中高檔食品如象拔蚌丸等，而且重係用手打自製，加埋鴕鳥肉、日本海帶呢啲中價特別嘢，都係屬任食清單中，唔使另加錢！
即劏即整 情侶客多
據火鍋店樓面歐陽經理表示：「其實呢個價錢真係得個做字，市況差咗，用料就一定要更靚更新鮮，好似我哋用全部即劏海鮮，比市面好多雪藏貨，我哋真係優勝好多……九至十二點最旺場，情侶客居多，好奇怪！」
食客Venus（左）?亞忠：我哋原本喺尖沙嘴返工，但都走到嚟呢度食，覺得佢最抵係將一啲中、高檔食品，都列入任食清單，而且自助餐價錢都好平好合理。
八仙樓海鮮酒家
地址：旺角砵蘭街109號地下（近登打士街）
電話：27701111
「象拔蚌魚蝦蟹任食自選火鍋」價錢：九點後至凌晨六點鐘入座$38（連茶芥醬汁加一，總收費大概每人$60）
每晚八、九成滿座
講到邊個搞起旺角自助火鍋文化，又點可以唔提最早喺旺角引入一爐雙食嘅福星？佢將中式嘅打邊爐概念，溶合韓式龜背燒烤中，一次有齊兩種食法。
據該店經理表示：「呢種任食自助餐最能吸引年輕高消費人士，好似喺呢個肺炎時期，都可以閒日維持喺八、九成滿座，而且近年重開始有大學搵我哋做千人宴到會㖭，農曆新年前中文大學嘅千人宴，平均每圍14人都係收佢$550……呢個可能係一條新出路！」
食客蔡先生：覺得呢度價錢幾抵，每個月都會同成班玩友上嚟幾次！啲嘢食都OK，啖啖肉，上嚟一定食得飽。
福星火鍋海鮮酒家
地址：旺角女人街1A-1J時尚廣場1樓
電話：27822600
價錢：凌晨一點半至五點每位$45（限食三小時），一樣任飲啤酒、橙汁，任食雙爐「邊烤」，兼包加一、茶芥、湯底、酸菜等費用。
叫多碟菜都有賺
據該酒樓梁仲賢人事經理表示：「其實市況差最好嘅應對方法，並唔係消極咁一味從壞處想，雖然食客人數差唔多少咗成半，不過咁亦代表我哋有更充裕嘅時間，去提升食物品質，做飲食服務行業始終要睇長線！」
論到倫敦大酒樓最出名嘅抵食嘢，當然係每晚六點開始嘅$1雞（小菜部）啦！五位以上每枱可以叫一隻，加碟二十幾蚊碟嘅小菜都有賺。呢度重有$1両灼生蝦（每位4両計）同$1燒腩肉，都一樣咁抵食。
食客Mandy：啲雞肉真好滑好香，$1雞自己整都唔得啦！
倫敦大酒樓（旺角）
地址：旺角彌敦道612號好望角大廈
電話：23329982