噚日外交部駐港特派員吉佩定出席香港美國商會午餐會做演講嘉賓，即場解答班花旗佬提出嘅尖銳問題，全部都以英語進行，繙譯都慳番。
美國商家主要集中問肺炎同美伊戰爭，不斷追問點解中國政府發放消息咁慢。吉佩定答問題真係幾淡定，雖然多數講番官方立場，但又會爆吓肚，話自己都覺得內地政府反應有啲慢，不過佢之後連忙兜番，解釋話呢隻病毒太新，內地都要多啲時間先研究到係乜嘢問題。
美國佬又係咁追問，中國點解唔幫手解決北韓核危機？吉佩定話中國咪鼓勵緊你哋美國人同北韓政府坐低傾掂件事囉？呢句反擊，引來全場笑聲。
而梁愛詩都係午餐會座上客，詩姐姐會後俾記者追問係咪會做後備特首，佢話機會低到幾乎係零，因為乜都要按《基本法》規定做，即係話除非煲呔同阿松都中埋招。
（圖）講到做唔做到後備特首，詩姐話要按本子辦事。
傳真︰2623-9278
電郵︰