非典型肺炎肆虐中港兩地，愛華頓噚日亦最終放棄下個月中國之行，對球迷或者愛華頓嚟講都係一大損失。
愛華頓公關方面承認，為咗保障職球員健康着想，最後無奈取消今次訪問，對佢哋計劃打開中國市場有一定影響；話晒剛啱係聯賽打低紐卡素，仍然有機會爭下屆歐冠盃資格，加埋朗尼人氣急升，下個月出訪中國喺良機。「拖肥糖」重喺官方網站提早公布來季三件新球衣，諗住訪華時賺番筆，今次真係大失預算。
愛華頓唔嚟，我求大俠當然關心另一英超聯利物浦七月訪華計劃，話晒「紅軍」更具號召力；雖然友賽門票價錢已經公布咗，但球會始終以球員健康為上，惟有期望肺炎快快消失，否則係香港球迷損失！
𠵱家喺德甲聯包尾嘅科特布斯，日前開出高達六十萬歐元嘅獎金，以刺激隊員可以竭盡所能打護級戰。雖則話重賞之下必有勇夫，但係我求大俠就唔認為佢哋條橋行得通。事關科特布斯之後場場硬嘢，唔係對強隊就係對護級球隊，加上離留級線有七分距離同埋本身實力太差，所以就算佢哋高層出多多錢，相信都係神仙難救。
巴西政府決定喺全國掀起反文盲行動，而佢哋更專登搵咗喺巴西，甚至乎國際球壇最出名嘅球星朗拿度，嚟成為反文盲大使。我求大俠對巴西呢個行動都好支持，不過對於選朗拿度嚟做大使，就有啲保留，因為「哨牙仔」教育水平有幾高大家心裏有數，唔通有關方面想搵佢嚟做「反面教材」？
噚日我哋報道咗曼聯球迷包亞喺上星期六場聯賽聯同九個朋友，一齊扮曼聯球員呢單新聞，佢哋𠵱家已經俾警察拉晒，正保釋外出，而曼聯更立即終身禁止佢哋入奧脫福球場。其實開玩笑本來無傷大雅，但最衰就係奧脫福將舉行今屆歐冠盃決賽，包亞佢哋竟然可以輕易通過奧脫福保安，曼聯又真係幾冇面喎！
火箭同太陽兩支爭入NBA季後賽球隊，隊中兩位新人姚明同A史杜達米亞都被傳媒視為最佳新人大熱人選，但係CBS網頁竟然將熱火嘅卡朗畢拿排係呢兩位仁兄之上居第一；雖然呢位前鋒係新人之中得分、偷球同上陣時間都係最多，重愈打愈好，但睇怕熱火成績咁差，風頭又差姚明成截，我求大俠好懷疑佢獲獎嘅機會有幾高！