近排人人聞肺炎色變，搞到個個足不出戶，好深閨！不過講到尾，始終都有班打工仔日日要出街食飯，搵間「好照顧」啲嘅，當然食得安心啲，小記最近逛旺角女人街，發現裏面有間「麵麵棧風味小館」好識做，不論早、午、晚入去食飯，都免費贈送一碗老火「防非典型肺炎湯」。
嫌板藍根太涼
老闆娘鄭太話，早兩、三個星期前已經有板藍根湯水免費贈送，不過味道太苦又太涼，所以近排新出咗一款清潤去肺熱嘅雪梨湯，材料分別有主角雪梨、涼瓜、排骨、蜜棗、蠔豉及淡豆豉等，足足煲成3個鐘，真係好有家庭風味，食療功效同板藍根差唔多，都係以清肺熱為主，不過無咁寒涼，比較老少咸宜。
記者、攝影：朱崇德
黎先生：一個人搬出嚟住，叫我自己煲真係好麻煩，呢度嘅湯勁多料又老火，好有家庭Feel。
「麵麵棧風味小館」
地址：旺角通菜街57號地下（女人街內）
電話：27108133