阿董真係邪，講個樣衰嗰樣，佢話搞旅遊物流，點知祖國送畀HKSAR一個非典型肺炎之吻，呢個kiss真厲害，一錫之後，冇人敢再嚟，機場成為重災區，航班少咗兩成幾，旅客人數肯定重差，分分鐘唔見咗一大半。
咁慘情，相信機管局主席馮國經諗都冇諗過。機管局有乜應變方法，辟一辟邪呢？第一，鄭大班鼓吹一人一口罩，機管局（AA）就話所有前線同後勤都可以一人十口罩，前線更無限量供應，任你換。
第二，雖然形勢認真唔樂觀，都要保持笑容同士氣，因為要做帶頭示範作用。咁戴住個口罩點笑畀人睇呢？用對靈魂之窗，用關心嘅語氣搭夠囉。
第三，同啲商業夥伴日日開會，出快訊報告最新發展，短期內喺網上提供各地嘅防SARS新措施，等大家有所準備。做咁多嘢，都係希望旅客恢復信心坐飛機，但係一日未搵到病源同解藥，邊個會咁勇敢呢。有人講笑話，如果一定要坐飛機，記住全程戴住個N95唔好除，吸取康泰團嘅經驗，記得送埋口罩畀前後左右嘅乘客，唔好慳。
傳真︰2623-9278
電郵︰