肺炎潮已困擾香港足足一個多月，每日都有新增病例，亦經常有人病死。有個芬佬朋友對阿虎話，睇趨勢SARS未必太嚴重，因為在外國因傷風感冒而死的人數，隨時高過SARS，而且因SARS死亡的人，多數是老弱及長期病患者，健康人士可康復出院的比例頗高，所以投資界其實對SARS不太恐懼，反而各行各業受港人情緒低落而飽受打擊，對本港經濟的影響更大。
香港受肺炎困擾，相信要到香港以致全球都接受非典型肺炎只不過是一種風土病才會停止，要改變呢種觀念需時甚久，絕非一兩個月內做到，所以近排已有長線基金撤出港股，地產股噚日更出現一輪洗倉潮。
港股噚日收報8806，跌155點，成交61.8億元。期指則收8790，跌135點，低水16點。聲言可能最終減少1/3航班的國泰航空（293）噚日再挫3%，收報9.60元。不過，國泰股價其實算硬淨，因為唔少恒指成份股，早已跌破911及98年金融風暴低位，而國泰仍較911時低位5.90元高出38%，基本上係遠遠跑贏大市。
ICQ英哥話，自從911後，好多航空公司唔係收縮業務就係要申請破產保護，值得投資的國際航空股所餘無幾，除非國泰宣布破產，否則芬佬冇可能對國泰徹底洗倉，對芬佬而言，只要國泰唔跑輸大市，佢哋已經當有交代。不過，唔排除國泰會繼續陰陰跌。
中航技術（232）宣布悉數註銷近2.8億元累積虧損。黑客話，呢一招擺明係想為派息鋪路，近期資金冇乜出路，投資者又重視股息，所以管理層希望以派息吸引投資者捧場。
阿虎