美軍攻入巴格達，市場憧憬美伊之戰近尾聲，杜指周一晚最多升過243點，高見8520，受制於去年12月延伸降軌，大幅回吐，最後只升23點，收8300。杜指走勢如早前預測，升至降軌阻力先出現回吐，現時短期升軌在8160，20日線在8120，成為重要支持位，未失守前，美股不可言淡。
美股高開低收，加上有消息肺炎由淘大花園擴散至牛頭角下邨，港股周一升幅連本帶利歸還，恒指噚日下跌155點，收8806。趙飛雲周一晚睇見杜指先升後回，已預期噚日港股表現唔慌好，但有感近期手風欠順，所以打消早市補回恒指Put輪的考慮，希望唔會再次送「車尾」？
恒指周一重返20日線之上收市，噚日重新跌穿，9RSI亦回頭跌穿50中軸，但目前仍守5日線（現處8789），未可批死反彈已完。不過，恒指就算反彈未完，但可升幅度亦十分有限，目前50日線下降至9076，降軌阻力在9098，恒指在9100之前阻力非輕。趙飛雲仍維持9100買恒指Put輪的策略，現時買恒指Put輪要日日計數，噚日9587溢價縮回0.3%，槓桿率有8倍，計落抵玩過9619及9674。
滙豐（005）噚日跌0.50元，收83.50元。滙豐83元未失守前仍屬強勢，如見跌穿，買恒指Put輪亦可安心啲。
早前提過意科（943）應該未玩完，等待50日線升近才伺機再動，現時50日線升至0.246元，在0.25元水平可留意。
趙飛雲