前年嚟過香港開騷嘅日本搖滾班霸DragonAsh，喺日本band壇好有地位，主音降谷建志好識利用自己嘅影響力提拔新人，最近佢成立咗間新唱片公司MOBSQUAD，重同上年已經紅到連好多本地歌迷都識嘅麻波25同埋SOURCE，着到好似黑幫人物咁以MOBSQUAD名義一齊夾歌出碟兼開騷，佢哋嘅新歌《MOBSQUADII》MV，出動好多靚女做人肉布景板，真係好鬼過癮。
MV一開始就出現咗一大班胸前有兩粒大星星嘅裸女，佢哋嘅化妝好古怪，又做埋一啲好似機械人嘅動作，完全都係為咗配合首歌當中出現嗰份好八十年代NewWave電子音樂feel嘅趣怪聲音，班女仔重好搞鬼咁不時互摸patpat㖭。
而MOBSQUAD成棚人亦喺MV入面rap到飛起，搞到連招財貓亦要喺鏡頭前學佢哋咁做出rap友手勢，相當搞笑。
另外，DragonAsh同麻波25及SOURCE，將於今個星期四、五喺東京搞兩場騷，慶祝MOBSQUAD成立，唔知到時場面會唔會咁激呢？