在家可以做啲乜？可以經歷外面的驚濤駭浪，保持頭腦清醒；又可以一邊開心大笑一邊舒展筋骨，保持身心健康！咁神奇？當然唔係隨口噏，買副BoardGame返屋企，就要乜有乜，要學曉理財投資、要鬥食腦，甚至做警察……幾歲到幾十，都一樣有益，最重要係，保持動動腦，人都醒目啲！
記者：招佩珊 攝影：黃子偉
Model：Gary、Karen、Vivian
呢排經濟受重創，昔日的搶錢機會不再，不過亦是儲彈藥的好機會，這兩個勁Game肯定可以提升你日後的搶錢能力！
讀過《富爸爸窮爸爸》可認識到有關理財觀念，而書中提及的教材亦衍生為《現金流》呢款BoardGame，而兒童版所包含的主要金錢問題會比較簡單，例如只有資產、工資、支出及負債等基本項目。𠵱家唔少後生仔都只識先使未來錢，係時候先嚟教教小朋友點理財，等佢哋長大後都唔會欠落周身債要你還。
《現金流》（兒童版）
售價：$367.9（b）
適合年齡：6歲以上
用腦指數★★★
呢個係得獎之作，獲1995年德國遊戲賞第一名及最佳遊戲大賞，一啲都唔講得笑，攞不同資源卡如木卡、磚卡或麥卡等在《卡坦島》（遊戲板）起屋、鋪路、建城市，最先取得10分便贏，看似容易，但箇中千變萬化極考腦筋，單是組成遊戲板的4張海陸地圖就有底面兩邊，不同組合不同方向就可合併千變萬化的資源分布，因為資源分布的不同，每次致勝的關鍵都不同。
《卡坦島》
售價：$350（a）（需一日前預訂）
適合年齡：10歲以上
用腦指數★★★★
唔想用腦？不如就伸展一下筋骨吧？只要身手靈活就取勝，一邊玩一邊運動最有益。
擰一擰塊紙板上的箭嘴，轉到「左手紅色」，就將左手放在大膠布上的紅圈，餘此類推，手腳分分鐘蹺埋一嚿，邊個最先跌低邊個輸。電視上都不時會出現藝員們興高采烈玩這個遊戲，自己玩就更興奮。若然地方有限，就可以玩個縮細版《眼明手快》。
其中一個玩家扮通緝犯，其他人就做特警，憑通緝犯4次現身的地方做線索去捉賊，呢類推理遊戲確實會諗到頭都爆。用腦指數奇高，但仍高踞好賣BoardGame一席位。玩的時候，做通緝犯的一個最好做足防禦措施，例如戴太陽眼鏡同Cap帽以防眼神涉露行蹤。
《蘇格蘭場特警》
售價：$79.9（b）
適合年齡：10歲以上
用腦指數★★★★
自1959年開始玩到家陣的經典征服世界戰役遊戲，至今已經演變到有電腦版同遊戲機版，原來人類始終迷信戰爭，日日在電視上看到無辜死傷、血流成河，倒不如在遊戲版上空談征服世界來得輕鬆。親手逐粒士兵和炮台放於紙板上夠過癮，有點返璞歸真。雖然都是軍隊部署及攻防戰略，但為防左右敵人暗中結盟，確實半步都唔敢行開，連厠所都要去少次。
《戰國風雲》
售價：$199.5（b）
適合年齡：10歲以上
用腦指數★★★★
店舖資料：
（a） 寶源國際貿易有限公司
地址：深水埗福華街黃金商場12號舖
電話：27957288
（b） 玩具反斗城
地址：銅鑼灣告士打道311號皇室大廈3/F
電話：28811728