話說一位讀者葉先生為「沙士病毒」與「美伊戰事」卜卦，解釋詳細，左丁山睇唔明，請岑公逸飛代睇，再話番畀左丁山聽。岑公話：「卜卦有兩部份，第一，卜卦要心誠求知，不可亂咁玩，最好嚴肅處理，沐浴更衣，焚香拜請，先至卜卦。第二，如何解釋卦象。我唔知葉先生如何卜卦，不敢置評。至於解釋方面，葉先生解得好好，行家也，我同意佢對『沙士病毒』嘅解釋，對『美伊戰事』則存疑，不過太複雜，你唔會聽得明白。嗱，唔好導人迷信呀，卦象如此，只係依書直說啫。」
葉讀者以「六爻預測法」推論，病毒午火自寅，卯月（皆屬木，即陽曆二月三月）相地得生，開始壯大，由東北（廣東）向東南一路發展下來，料於夏季病毒更為慘烈而無克制之方，有冇得救要睇醫生狀態。亥水為醫生，得日神支持而旺，又有兄弟西金暗動相助，秋季必有良方良藥面世，冬季全殲病毒可期。
唉吔，「沙士」喺夏天（陰曆四、五、六月）更厲害，要到秋天先有得救，有排捱。葉讀者話到時領頭功之良醫名醫必定係屬雞（酉）、屬豬（亥）之輩，或者抗病毒之良藥，來自雞、豬身上。立即翻查萬年曆，屬雞豬之年係一九三三、一九三五、一九四五、一九四七、一九五七、一九五九、一九六九、一九七一，梁智鴻、楊永強唔知係邊一年出世嘅呢？葉讀者又按卦象推論，暫時關閉醫院、學校，是上上之策。各位睇完呢篇，千祈唔好鬧左丁山不信科學信卜卦，唔鍾意就笑吓啦。