非典型肺炎令九龍灣淘大花園成為近排最唔受歡迎嘅屋苑，買賣同租賃都停晒。不過開始有啲轉機，有名對淘大情有獨鍾嘅租客，之前睇中咗個單位，月租五千蚊，準備扑槌之際就爆發肺炎，照計應該打退堂鼓，不過佢真係好鍾意呢個單位，甘願博一鋪，加上業主破例應承個租客6月先起租，兼月租減到四千七，成為肺炎之後首宗租務成交。
代理話一般做法係，落實租約後兩個禮拜就要起租，但今時今日只要有人肯租，做業主嘅都肯讓步，免得第日肺炎淡化後，啲租盤一窩蜂擁晒出嚟鬥平，到時點減都冇用啦。
蘭西又收到風，一名喺上月尾租咗E座2號室嘅租客，住唔夠兩日去咗公幹，返到嚟瞓醒覺（或者未瞓醒）就俾人封鎖隔離，冇幾耐重入埋營㖭，咁不幸嘅遭遇，佢嘅業主都好同情，主動免收一個月租金，約五千蚊，雖然銀碼唔大，但係證明香港人都唔係睇錢至上，重好有人情味。
𠵱家市場大把供應，買家一般都會傾向買新樓，但其實舊樓原來都好多人吼。中原地產執行董事張奕威話，啲細銀碼舊樓，就算係冇𨋢，買賣都好活躍，特別係市區四百幾呎嘅貨仔。
啲十幾二十年舊樓點解咁好賣？張奕威爆料話買家大部份都係投資者，買入一個四百幾呎舊樓單位，分間成兩個套房出租，每間收番三千蚊，比起買入價只係幾十萬，租金回報都幾和味㗎！
原來呢批投資者主要係睇好政府將出台嘅租金津貼計劃，公屋擠迫戶或者係輪候冊人士，都係客源。呢類細銀碼舊樓，主要分布喺環頭環尾區份，大行唔會做，變成地膽細行獨市生意。
今年二月結業嘅鴻運地產，其中一間由老闆田國強或有關人士持有嘅舖位，淪為銀主盤後，𠵱家攞出嚟拍賣，以一百零八萬賣咗。蘭西搵田生求證，佢話間舖喺92年買入，一直保留長線收租，後因鴻運要資金周轉，抵押畀銀行。
噚日舉行拍賣會嘅日進測量師行話，個舖喺馬鞍山福安花園地下七號，開價九十六萬，最終以一百零八萬賣出，舖位一百七十九呎，每呎6034蚊。個舖𠵱家由小食店租用，每月租金收入一萬一千五百元，租金回報率十二厘八。
大規模爆發非典型肺炎嘅九龍灣淘大花園，政府話疫症係透過污水渠傳播。有業界人士話，當事件過去後，估計淘大花園會進行換渠等翻新工程，而同類嘅舊屋苑，睇怕都要跟住咁做。若果唔係，下次有事發生，就難辭其咎。
做大型裝修工程嘅公司，今次有番啲生意，唔使咁慘。
睇嚟啲裝修公司可以查吓，有幾多舊屋苑有需要做翻新工程，然後主動出擊，喺呢個舊屋苑翻新潮中搶佔先機。
地產代理近期大歎生意難做，估唔到啱啱話要節流嘅美聯，屬下香港置業噚日就宣布，摺埋喺小西灣藍灣半島同紅磡海逸豪園嘅分行。
香港置業董事胡日發話，咁做係進一步減省開支，先至可以捱過突如其來嘅寒冬喎。呢兩間分行都係喺01年初開業，專做二手同租務，一向生意都唔錯，但近嚟業績大跌，惟有結業。
另外，非典型肺炎重災區九龍灣淘大花園，利嘉閣噚日重開嗰度嘅分行，暫只有四名員工駐守，其他去推銷將軍澳廣場。
蘭西
電郵地址：
