經紀陳噚日講咗一件事俾小初知，但小初聽完後半信半疑，都唔知真定假。
話說有隻股份叫做曼盛生物科技（512），近期股價相當波動，市場傳出隻股可能出現股權變動。小初記得，隻股在年初就同樣傳聞發表過澄清聲明，否認大股東磋商出售股權。
究竟市場點解會再次傳出呢類消息呢？經紀陳話，唔排除係此一時不同彼一時。
曼盛噚日最低見過0.07元，收0.097元，跌3%。但較過去1個月高位0.156元，則下跌37.8%，可見曼盛股價表現認真麻麻。小初記得，隻股好似在上個月中，以每股0.11元配售約6千萬股，集資凈額約645萬元，睇嚟接咗貨而又未沽嘅投資者要損手。
經紀陳又話，曼盛大股東喺舊年購入隻股至今，除咗改名同埋表明會投資生物科技外，至今都唔見有大動作出現，可能係咁，所以傳出有投資銀行界人士提議賣盤。
慕容小初