炒股票唔守紀律通常冇好結果，趙飛雲上周五見恒指補回3月31日下跌裂口8755至8812，冇按原計劃將恒指Put輪9587止蝕，自己安慰自己只係假期前淡友食胡平倉，大戶趁勢挾倉而已，博上周五美股下跌，噚日收復失地。
美股上周五反覆回升36點，再加上美英聯軍捷報頻傳，趙飛雲已心感不妙，所以周一提醒讀者恒指破8900，Put輪要先止蝕。結果恒指噚日午市真係升穿8900，總算快手在0.243元止蝕，恒指最後升至8962收市，再升139點。
趙飛雲睇淡後市大方向未改，只是好友炮火太猛，惟有棄守陣地，保存實力捲土重來。恒指突破20日線後，將上試50日線（現處9089）及去年12月延伸降軌9150，估計升破機會不大，是重新補回恒指Put輪的時機。
恒指Put輪9587喺5月5日到期，時日無多，噚日溢價仍有0.83%，槓桿率9.8倍，唔算太抵玩。想睇長些少可揀9619及9674，2隻輪數據半斤八両。
目前造淡亦非「坐定粒六」，滙豐（005）噚日以大陽燭升穿50日線83元，亦是下降楔形降軌阻力，收84元。若是真突破，量度升幅可見92元，成為淡友心腹大患。以勢論勢，滙豐若不再跌破83元，將確認轉強。不過，滙豐發新股收購HI後，街貨大增，潛伏唔少伺機獲利盤，走勢一旦逆轉，沽壓亦相對增大。
趙飛雲