日本春季新劇即將傾巢而出，我羅拉發現呢季有唔少作品，都係由日本好出名嘅漫畫改編，最受注目嘅當然係妻夫木聰主演嘅《杏林先鋒》啦，原來佢哋都跟得幾足㗎，不如大家又睇睇真人版同漫畫原作版有幾似啦！
由漫畫界新秀佐藤秀峰創作嘅《杏林先鋒》，喺香港都有推出中文版，加上係「撲水」靚仔妻夫木聰主演，自然較受日本同香港fans留意。聰仔喺套劇入面扮演見習醫生齊藤英二郎，雖然佢將頭髮梳番落嚟都幾似樣，不過睇嚟佢演得比較含蓄，唔多似原著嘅角色咁熱血同肉緊喎！
松本潤同小雪一齊合演嘅《你是我的寵物》，係由小川彌生嘅少女漫畫改編而成，小雪扮演才色兼備嘅女記者，外貌都幾神似，而阿潤個樣亦似足少女漫畫人物角色，不過最搞鬼係佢兩個會學漫畫咁喺梳化扮「我係主人你係狗」！可惜早排有傳阿潤非法佔用公園趕戲，搞喊細路兼遭主婦狂鬧，可能會影響收視。
如果有睇開日本漫畫嘅話，都應該知道今季幾套日劇中最經典嘅原著漫畫，肯定係由佐佐木倫子操刀嘅《動物醫生》，雖然佢屬於少女漫畫，但佐佐木當年因為畫得啲貓狗好生鬼，所以大受歡迎，又攞咗好多漫畫大獎，而日劇版裏面嘅狗仔，似乎亦比起吉澤悠同要潤兩位師奶殺手更加吸引。