籃球，對於在屋村長大、小學已經落街打波的Steven來說，是至愛運動。他說：「鍾意籃球令我流好多汗，流汗的感覺好舒服，又抒發到情緒。我小學開始玩籃球，因為屋企附近都有籃球場。」這位籃球癡，曾在中一時同朋友奪得「三人籃球賽」季軍。就算現在當了歌星，技癢時也會到觀塘翠屏道邨家附近的籃球場打波。
而在十八歲的Steven心目中，NBA76人球星「壞孩子」艾華遜是他的至愛。「我鍾意他夠型、夠勁、夠準，曾經想過要整他那個頭，覺得好有型。」
「我同班朋友一直都有睇NBA，開始睇籃球時第一個鍾意的球星是佐敦，但慢慢看下去，開始留意其他球星；但最吸引我還是艾華遜，他雖然只得六呎高，但彈跳力驚人，速度又快。我唯一不會學佢的是紋身，覺得好傷身，一旦紋了就好難甩。」
小小年紀的Steven有用不完的體力，拍照那天，他拿着籃球就波不離手，一到球場已經變了脫韁野馬，拉着Kenny一齊打籃球。