自爆小時候還未懂性，只2歲就「撻」阿姨的化妝品畫花面的Ivo，天生就鍾意扮靚。中五畢業後就立志學化妝，至今半年。除學主題化妝，其他如花甲、水晶甲等，統統都有興趣，重連腳甲都畫得一絲不苟！除了外面要靚，裏面一樣馬虎不得。Ivo不時會同媽咪齊齊煮些美顏湯水及豐胸菜式，一於由內靚到外！
記者：吳佩璇
攝影：陳陶鈞
鍾意扮靚，加上在學化妝，Ivo最捨得使的就是買化妝品。基本上每月都花成二千蚊添置新產品。單是指甲油，保守估計都超過50支，睫毛液閒閒哋又係過50。其他的唇膏、EyeShadow、假眼睫毛，統統都以二、三十計，再加埋細細粒、數之不盡的水晶石，真係成間房都堆滿化妝品。近期更熱愛玩指甲，約個零禮拜就會為指甲換花款，就連示範做菜時，因開不了鮮奶蓋，也即刻緊張到同攝影師講：「不如你幫我開，我驚整斷啲指甲！」
Ivo的媽媽不到40歲，就有個18歲的囡囡，絕對是年輕媽咪一族。所以Ivo同媽咪，感覺猶如兩姊妹。而媽咪雖不施半點脂粉，但骨子裏卻一樣貪靚。訪問前一天，兩母女就在DIY珍珠末蜜糖面膜。媽咪更每星期必做一次，秘方是1茶匙珍珠末加1茶匙蜜糖，敷15分鐘。而每一次都是媽咪身先士卒，試過掂之後再叫Ivo試。之後滔滔不絕教記者如何一蛋兩用：「蛋白敷面就最美白、蛋黃就最啱黐黑頭。」Ivo還踢爆說：「佢會一早摷醒我試乜試物，唔奉陪一定俾媽咪煩死！」原來鍾意扮靚都是增進家人感情的良方。
眾所周知蘆薈有美白作用，除可直接敷在面上減斑之外，用來入饌還有清理腸胃、排走毒素的功效。至於木瓜㷛湯唔單止清甜，多吃木瓜重可以豐胸。多飲這個湯水，可清降肝胃火氣，至於體質較虛寒的朋友，就不宜加入太多蘆薈同煮。
材料：
雞半隻
木瓜1斤
蘆薈適量
薑2片
多吃核果類和含維他命C的食物，不但可防疲勞，還可提高應變力及抗壓力。而松子有很不錯的滋補作用，可潤肺祛風，並能調節內分泌。至於黑芝麻一樣是健康食物，補肝腎益精血，除防白髮及脫髮，更有助合成荷爾蒙。別小看這道小食，可改善營養吸收力，促進全方位機能發育。身體發育得好，對豐胸亦有一定幫助。
材料：
鬆餅粉150克
松子50克
黑芝麻20克
牛油及蜜糖少許
家住灣仔的Ivo，平日同媽咪都離不開行灣仔大街巿，或鵝頸橋街巿買餸。其中灣仔大街巿勝在夠大夠集中，基本上樣樣餸菜齊備，想買乜有乜。不過買餸經驗豐富的媽咪就話：「鵝頸橋街巿乾淨啲、好行啲。最正就係啲餸夠平，兼實冇呃秤。」所以這兩處都是她們推介的心水街巿。