意甲𠵱家由祖雲達斯領放，不過我求大俠心諗，祖記有咁好形勢都唔係靠運氣得番嚟，而係靠膽博膽，之不過博得聯賽嚟，害咗歐冠盃，因為前鋒查斯古特因傷冇辦法對巴塞隆拿，而尼維特亦可能缺陣。
我求大俠真係有啲估唔到，祖雲達斯上周禮拜六會「夫添」同都靈市弱隊拖連奴練過。
其實佢哋今季喺幾場歐冠盃大戰之前嘅聯賽，都有收起正選「留力」；不過上個禮拜六佢哋可能估到米蘭雙雄失分，於是就心無雜念咁出盡迪比亞路、尼維特及查斯古特呢三條Ａ去攞拖連奴。
但係博就博到三分嘞，之不過聽晚迎戰巴塞，真係因為祖記有主力受傷而偷笑。
米杜士堡季初喺皇馬借入嘅中場謝利美愈打愈好，日前皇馬體育總監華丹奴就話，只要米杜士堡畀一千萬鎊轉會費，就可以買斷佢。大家可能覺得皇馬坐地起價有啲無品，但原來當初兩會已有協議，米杜士堡想買斷謝利美真係要畀呢個價錢！不過我求大俠就覺得，呢個時勢重有幾多球員值咁貴吖，一千萬鎊？咪即係叫米杜士堡季尾放人啦！
中國球員邵佳一早前加盟慕尼黑1860，結果球會喺嗰段時間嘅成績一落千丈，接二連三輸波，喺德國盃重出埋局𠻹！相比起踢愛華頓嘅李鐵呢塊珠玉，邵佳一自然畀我哋迷信嘅中國球迷話佢腳頭唔好。不過邵老弟喺禮拜日聯賽首次替慕尼黑1860正選上陣，結果幫球隊贏慕遜加柏二比○，口痕友唔好再話佢陀衰家嘞！
我求大俠噚日講過，英甲波經常出現一啲兩隊各有四、五個入球嘅波膽，可惜冇乜大莊有開呢啲波膽盤口，如果唔係，今晚又踢四場嘅英甲波賽事，又可以畀大家喺歐冠盃兩場大戰以外多個博冷嘅選擇！其實諗下計，博入球總數達「七球或以上」都得啫，今晚場般尼對普雷斯頓就最似開呢瓣，有成二十倍㗎！
拓荒者嘅億萬富豪班主保羅阿倫向來對傳媒闊佬懶理，但喺最近佢班球員衰完一次又一次，變成過街老鼠人見人憎。搞到佢老人家成為球迷同輿論嘅箭靶，噚日佢終於被迫紆尊降貴，向當地一份報章誓言，不惜交易、罰錢或停賽，都絕對唔會容忍任拓荒者球員胡作非為，睇嚟拓荒者就快要大換血囉！