美國就快擺平伊拉克，刺激外圍股市勁升，港股噚日午市亦出現淡友平倉現象，恒指升139點，收報8962，成交64.64億元。
美軍似乎仍在圍城，唔知等乜？ｉ師傅話好懷疑美軍會否在伊軍未使用「大殺傷力」生化武器前搞掂伊軍，話晒今次美國攻伊主要藉口，係伊軍擁有足以威脅全球嘅大殺傷力武器，今次美軍攻城趕狗入窮巷，唔捱番侯賽因一兩口生化大炮又點講得過去，布殊容乜易俾人鬧佢殺錯無辜，日後重邊有面目向盟國及伊拉克收重建費用。
香港網（8006）噚日突然急升逾46%，市場傳炒私有化。阿虎幫香港網計一計，原來香港網手持12億元現金兼冇負債，唔理公司其他資產值幾錢，淨係持現金已達每股0.30元。
香港網上周五收報0.26元，股價擺明係偏低，不過經噚日急升逾46%至0.38元後，香港網又似乎升過龍，因為香港網已否認私有化可能，而且管理層表明會用12億元現金進行收購，即係話管理層對時下派高息潮流有所保留，唔會跟風派高息，股東未必可以即時得益。
港股受肺炎潮影響，各行各業飽受打擊，雖則港人被迫留港消費，但消費主要集中買消毒劑及口罩，不過佑威（627）今次確醒，及時推出納米科技口罩上市，為股份增加口罩概念，刺激股價急升5.88%，收報0.27元，成交207萬元。不過現時口罩價格已大幅回落，供應之多亦一時無兩，口罩概念唔知重可以炒幾耐，追捧佑威亦要小心。
萬勝證券（376）噚日停牌，公司將發新股向關連人士收購資產，聽講話交易規模唔算好大，可以不理。
阿虎