恒指上晝升得13點，跟住傳出美英聯軍打入巴格達市中心，恒指下晝再升127點，埋單8962，距離9千只相差好少。
中東戰報消息似乎愈來愈好，但港股走勢要留意嘅係肺炎問題。港股要有大作為，肺炎事件必須先行淡化，最易睇嘅係每日呈報宗數有冇減少，喺數字未大減之前，咪過於衝動見高追貨，否則好易中招。
暫時9千係重要心理關口，滙豐（005）、中移動（941）同埋長和系股份變化，將左右恒指是否升破9千及能否企住9字以上。
地產股新聞唔妥，樓盤去銷唔易，睇樓人少，價格亦向下移，但地產股昨日亦有升幅，跌得多有技術性反彈一啲唔奇，但咪期望過高。能夠喺低位買到相關Call輪自然上上大吉，但升後再追要三思。
長實（001）收45.20元，升2.5%，若然升到46元以上，可以諗吓Put輪9741，隻輪8月到期，現價63仙，溢價7.7%，槓桿率7.2倍，正股派末期息1.22元，計埋股息因素，隻輪實際溢價只係5%。
新地（016）收38.60元，升30仙，吼住上到近4字，趁低位博Put輪9730。8月到期，現價46.5仙，溢價3.2%，槓桿率8.3倍。
章盛