「沙士」一事，搞到香港人仰馬翻，本欄寫咗幾次，引來唔少讀者電郵，各有不同意見，其中一位讀者話係東英大廈劉大鈞醫生嘅病人，曾於三月二十一日去過劉醫生醫務所，後來知道劉醫生中招入院，佢好想知道劉醫生嘅醫療狀況，是否正在康復中。好對唔住，左丁山只知道衞生署曾呼籲最近睇過劉醫生嘅病人，要與衞生署聯絡，至於劉醫生近況如何，據四月三日報道，劉醫生已經不治逝世。
記得馬主之中，有兩個劉大鈞，一位擁有「色種好」（蔡約翰馬房），另一位擁有「一畫開天」（呂健威馬房），兩隻馬嘅成績都幾好，馬主應該有啲運。與《蘋果》馬王童輝仄過，劉大鈞醫生就係「一畫開天」嘅馬主。
一位葉先生傳來「卜卦卦象」，其一預測「沙士」病毒，求得第四十四卦「天鳳姤」乾宮，其二卦為美伊戰爭求得第四十九卦「澤火革」坎宮。葉先生運用漢朝京房之六爻預測法及宋朝邵康節之卦象預測法，詳細解釋卦象。但係左丁山完全係外行，睇唔明，又咁蹺啱啱與岑逸飛講電話，問佢點解寫《信報》專欄，於是因利乘便，向素來精於《易經》嘅岑公問卦象之事。岑公話：「你都講唔清楚，e過嚟睇吓。」於是立即e過去，幾個鐘頭之後，再問岑公對「天鳳姤」、「澤火革」有何領悟。岑公解釋一輪，至於佢點講呢，明天再講。