呢輪人心惶惶，個個怕中招，特區政府嘅最高統帥董建華成為眾矢之的，八方日日都收唔少鬧佢嘅文章同詩篇，如果佢老兄控制不了SARS，又唔怪得陶傑哋叫佢落台。
誰都知道老董已盡晒全力，但身為第一護法嘅林煥光見到啲下台言論咁激，都要出嚟護主，甚至去信反駁啲專欄文章，話乜都賴晒董先生唔公平，呢啲公關嘢以前林D9都會做，但係講係冇用嘅，最緊要有料到，請董生快幾拍打敗啲非典型肺炎先啦。
講開林煥光，聽聞佢呢輪都係早早返工，夜夜都唔走，皆因非常時期是也，但八方亦提醒佢老哥要注意身體健康。人人都知，沙田乃高危地區，如果佢真的已由沙田城市廣場遷往駿景園居住，就更要加倍小心，皆因該屋苑管理處上周五晚，已經貼出告示，證實某座有住客已中招，重話會加強用漂白水清潔云云。
八方一家都住沙田，故此特別敏感，當然駿景園乃新型高級屋苑，空氣流通，應唔會好似淘大咁可怖，但畢竟預防勝於治療，已有居民一見告示，急急衝往百佳買埋架上最後一樽鬼佬白醋vinegar，實行喺屋企逐間房蒸醋消毒，信不信由你。
傳真︰2623-9278
電郵︰