昨日，亞Mark提過話法國先進（Citroen）汽車有意再度引入香港嘅消息，惹來好大嘅迴響，查實雙方據知仍處於磋商階段，故此就算落實的話，大抵都係年底或明年初才成事；惟近排香港汽車市道低迷，亞Mark都希望會又較多正面消息發放畀大家嘛！若然你係先進嘅Fans的話，咁就要耐心多等一會喇！另一方面，一直被日本車壟斷嘅客貨車市場，繼福特以新款Transit加入競爭後，響歐洲亦有一定佔有率嘅雷諾Trafic車系，亦正密鑼緊鼓準備響本地市場推出，新車不僅有一個有型入時嘅包裝、長短陣版載物空間闊落好用、一台1.9公升柴油Turbo偈嘅100匹馬力輸出外，重有低轉24.5kgm/2000rpm高扭力輸出，以及平均耗油量不過係6.5L/100km咋！若然為香港用家受落的話，或許Trafic重會有高頂、兩排座椅嘅客貨兩用型號輸港都唔定㗎！