停課十天了，每天只能在家中發呆的陳家三姊弟，整日活動只是瞓覺、睇電視同食飯，長此下去，不染病也發霉！已經瀕臨發霉的家姐靜蓉忽然K癮大發，但阿媽當然唔畀去啦！一向鬼主意甚多的小妹雪盈，竟誇下海口，說可以把屋企變成她最喜歡的那間HelloKitty主題房！大家一致贊成，於是齊齊動手，希望以最快速度，令爸爸回家有個大驚喜！
記者：梁佩芬 攝影：周旭文
Model：陳氏家庭
爸爸每天約七時放工回家，這個鬼主意於六時多才出現，要給爸爸驚喜，時間實在有點緊迫，於是由媽媽帶領，大家分工合作，務求用30分鐘完成。由於時間倉卒，來不及買材料，惟有將以往買下來的物品，改變用途，製作自家主題卡拉屋企。
五歲的雪盈，自小就鍾意HelloKitty，尤其公仔，一見到就要爸爸買，更視為至愛，從不肯讓人碰。不知是否悶得太久了，今天雪盈變得十分慷慨。她第一時間想起，上次去卡拉OK時，全房都是吉蒂貓的影蹤，所以立即入房，將床上所有公仔擺放到客廳每個角落，尤其在電視機前的位置，一定要見到好多公仔，先唱得開心，跳得過癮。
在客廳上放滿公仔後，雪盈扁嘴說：「都唔似嘅，有咁大個窗！」媽媽都有同感，便拉下窗簾，看看效果，可惜還是差一點點。這時讀三年級的哥哥思俊靈機一觸，大聲道：「上次我哋咪諗住做Kitty床單嘅，好似剩下一大塊布未用呀，不如掛起做窗簾，咁咪似囉。」二話不說，就飛入房找大布。之後與媽媽二人，一起度窗的高度，如此簡單的任務，又怎難到他呢？還懂得用衣夾將布夾在窗花處，驟眼看真是幾有氣氛！但雪盈還嫌不夠，於是又搬出爸爸送給她的吉蒂投射燈，放在客廳中央，亮着它，全屋就遍布不同的星座及Kitty圖案。
雖然成日喺屋企唱K，但近日細菌肆虐，唱歌前都要先將咪清潔消毒。用火酒輕拭兩支咪後，思俊覺得有好大味，很不習慣，想辦法驅除。他突然靈機一觸，想到用舊了的小手巾。就在雪盈的櫃桶內，找到兩條有點舊的手巾，用他們包裹咪頭，就不怕有味又合衞生啦！主題房終於完成啦！爸爸也正好回來了。好，今晚就一起唱K！
大女靜蓉沒有參與布置，原來她另有任務。她心想去卡拉OK時常吃零食，在非典型肺炎那麼嚴重的日子，需要增強抵抗力，吃零食太無益了，還記得上課時，老師說多吃乳酪可增加鈣質，加上爸爸又喜歡吃士多啤梨，於是她就決定親自炮製一杯好味的「士多啤梨乳酪凍」。
士多啤梨乳酪凍
準備四支純味乳酪，將雪凍的士多啤梨切粒，一齊放入攪拌機拌碎，最後再多加幾片士多啤梨。