國潤控股（175）早一排曾經公布，可能在大陸成立合資公司生產汽車。上周一開始停牌，連續好幾日都冇乜聲氣，靚女經紀有個客入咗唔少貨，所以問小初有冇隻股消息。
小初向周圍班老友索料，原來年輕賓架最多料，佢話國潤停牌與落實成立合資公司有關。國潤2月份公布，打算同大陸吉利汽車成立合資公司，由國潤持有4至5成權益，但呢個只係無法律效力嘅意向書，意向書到期日在3月31日，所以國潤在當日停牌，有待合資協議落實。
現時監管機構對呢類偏離本業嘅商業活動，睇得會比較緊，因此國潤停牌咁耐，或者同呢個原因有關。國潤為咗呢個合資項目，上個月中曾以每股0.55元，批1億股出街集資，但股價仍然好硬淨，聽聞因為成手貨都係落入好友手上。
小初並無沾手國潤，因為有幾個老友都同小初提過，話上海幫炒股有多少今非昔比，風險可能比以前大。
慕容小初