美國女歌手ChristinaAguilera嘅形象愈玩愈癲，唔少人話佢已經走火入魔，不過佢嘅廣告愈接愈多，早排Christina重靜雞雞幫美國NBA拍咗個廣告，無驚無險穩袋三百萬美金（約二千三百四十萬港紙），唔恨得咁多喇！
上次Christina無端端喺NBA明星賽嘅後台現身，我羅拉都覺得奇怪㗎喇，原來NBA當時已經斟佢幫手拍廣告，呢個廣告日前終於拍完，重日播夜播谷到行㖭。話說喺廣告入面，Christina唱咗首叫做《LoveItLive》嘅歌曲，叫啲年輕人多啲睇NBA嘅直播，而佢喺裏面亦使出拿手好戲，不時扭腰大跳勁舞，睇到後生仔熱血沸騰。
既然Christina做得NBA代言人，咁記者梗問佢最捧邊隊啦，但係Christina竟然好天真咁話：「其實我唔係好認識NBA，我熟美式足球多啲！」大拿拿二千幾萬請佢做代言人，你話佢係咪倒米呀！