假期外出，飲茶食飯，排長龍等位嘅情況已不復見，場面冷冷清清。非典型肺炎肆虐，傳染途徑又未確定，人人嚇到唔敢出街，來港旅客亦減少幾成，飲食同娛樂事業（包括戲院同卡拉OK）首當其衝，旅遊、交通，同酒店生意亦一落千丈。港商出外參展遭「封殺」，外商又唔敢嚟睇騷，後遺症影響製造業、貿易、出口同地產，幾乎瓣瓣有關。
非典型肺炎累到港人人心惶惶，經濟嚴重受創，若論衝擊，比金融風暴重大劑也。零售業則有好有壞，大型商場拍晒蒼蠅，超級市場就其門如市，人人大包小包儲足幾日糧，匿響屋企；藥房賣口罩同特效藥亦斷晒市。
香港經濟衰咗幾年，唔少行業已經叫苦連天，艱苦經營，希望捱多一年半載，有機會重見天日。金融風暴衝擊係漸進式，生意唔係一下子大減，一年幾個巴仙，幾年下來，夾埋少咗幾十個巴仙，做生意有時間慢慢縮皮來適應。今次非典型肺炎一棍扑落嚟，一夜之間，生意唔見幾成，資金流轉立即有問題，連守都冇得守，點算？相信倒閉潮好快出現。
香港經濟進入金融風暴以來最黑暗的月份──黑色4月，真係衰到貼地，希望今次係股市話齋嘅熊市第3期，雖然唔知要捱幾耐，但總有到底之日，之後由谷底回升，下半年或明年會再有好日子過。
講番股市，大勢係短線反彈，中線看淡，反彈目標係20日同50日線的8900至9100水平；至於向下望，則前低位8466失守，初步會跌落8000至7800。有危先有機，旅遊業雖備受打擊，但同旅業有關嘅股份，好似國泰航空（293）同中旅國際（308）等，就見有大行同基金收集，相信非典型肺炎一受控制，呢兩隻股份會係率先反彈嘅一群。
中旅2月高位1.43元，近日跌到1.03元才反彈，情況和上周六提及的偉易達（303）一樣，已充份反映行業和公司經營前景不利的因素，後市看好。中旅往績PE6.2倍，息率8.2厘，（02年12月年結）每股盈利和派息料減，但預測PE8倍，息率6.5厘，仍屬吸引。今年6月，中旅有認股證到期（行使價1.22元），可集資9.2億元。中旅現價1.1元，未來兩個月造上1.25元至1.3元的機會甚大。
郭兆誠