美英聯軍打入巴格達，戰事消息對股市算係中性偏好，但肺炎事件則仍然令人擔心，港股唔易大升，估計繼續反覆，高低波幅三幾百點，上完又落，落完又上，見高追貨見低掟貨，好易輸錢。
恒指8822，升多少少相信又會回頭，除非肺炎呈報宗數忽然跌到個位數字又或者真係發明有效預防藥苗。若然見恒指上到挨近8900嗰頭，可以諗吓趁市升，喺低位揸入少少恒指Put輪，對象有9674及9751。9674今年6月下旬夠鐘，現價31.5仙，溢價3.6%，槓桿率12.7倍；9751壽命長啲，8月下旬到期，溢價2.8%，槓桿率14.1倍。揸6月以後嘅Put輪，有啲着數，就係到期之前，好多未截息嘅大藍籌會除息，令指數跌啲，呢啲大藍籌有長實（001）、和黃（013）、長建（1038）、港燈（006）、中電（002）、新地（016）、太A（019）、國泰（293）等，所以Put輪實際溢價低過表面數字。
又唔使一面倒睇得太淡，個市若跌得急，則候低位搵啲大藍籌嘅Call輪埋手，和黃Call輪9606有得諗，8月初到期，現價51仙，溢價2.3%，槓桿率8.6倍。數據好靚，吼住正股回落至42元嗰頭，買9606博正股再反彈帶動隻Call輪升番。
章 盛