與栢芝幾成哥哥執導第一炮
霆鋒歎無緣助張國榮圓夢

謝霆鋒昨日在西貢拍攝廣告，他透露張國榮生前曾提及想找他與張栢芝合作拍攝一齣電影，霆鋒談及有關張國榮的一切時，情緒十分低落，並表示會到靈堂向張國榮致祭，霆鋒更揚言不怕在喪禮上與兩舊愛王菲及栢芝碰面。

謝霆鋒昨日下午往西貢濠涌片場，拍攝松日MP3廣告，更以「白馬王子」look示人，據知廣告商今次斥資超過七位數字的製作費，宣傳費亦高達過億元。而霆鋒接受記者訪問時，又透露一直渴望成為電影導演的張國榮，生前曾向他提及有個劇本，想找他與張栢芝參與演出。

通宵趕拍封面：
我同張國榮用同一個攝影師！
霆鋒於○○年時，曾參與演出由張國榮執導港台宣傳禁煙的短片《煙飛煙滅》，加上其母狄波拉與張國榮亦相識，故霆鋒得知對方的死訊時，感到十分傷心，昨日當記者問及有關張國榮去世的問題時，霆鋒亦表現得情緒低落。
問到霆鋒是否為張國榮一度將自己困於band房內，他低着頭說：「我諗唔止我一個人唔開心，我父母都有安慰我。本來我聽日（即今日）都要拍唱片封面，但係我會盡量今晚拍通宵，我同張國榮都係用埋同一個攝影師拍封面。」
再問霆鋒會否感到張國榮的去世十分可惜，他說：「咁嘅人才當然可惜，不過呢個係佢嘅決定。其實張國榮之前都有同我講過，話有個劇本想搵我同栢芝演出，但係呢啲都已經過去，所以我都唔想講得太多。我嗰晚都有睇到佢個電視紀念特輯，我都有睇到栢芝嗰部份，本來我都勸啲朋友唔好睇，有啲人睇到喊，事實上張國榮真係一個好好心地嘅人。」
栢芝在紀念特輯當晚，亦曾提及張國榮有意找她拍電影，好讓她拿「最佳女主角」獎。但當記者向霆鋒追問有關劇本一事時，他的思緒開始表現得十分混亂，居然回答記者有關紙紮攝影機的問題，連其經理人霍紋希亦忍不住在旁問他是否清楚自己所答何物，相信張國榮的去世，對霆鋒所造成的打擊真的頗大。

慨歎完美難求：
佢同我都係處女座，做事好執着！
霆鋒其後又提及張國榮生前與他的對話，他說：「張國榮曾經同我講過，佢同我都係處女座嘅人，所以做事會好執着。其實冇嘢係可以做到完美嘅，但係過咗去嘅嘢唔好再提，張國榮嘅離去影響真係好大。總之我真係好想所有人都要記住佢好嘅嘢，記得佢曾經為我哋爭光。」
此外，有報道指霆鋒已定做了一個紙紮攝影機準備燒給張國榮，他昨日說：「呢個係我同一班兄弟對張國榮嘅心意，其實我要多謝成龍大哥借個辦畀我哋，而成件事係由梅姐（梅艷芳）做統籌，我只不過係搵幾個師傅幫手。」

靈堂會兩舊愛：
怕啲乜？我完全唔覺得尷尬！
問到霆鋒怕不怕在喪禮上與兩舊愛王菲及張栢芝碰面時，他即反問記者：「怕啲乜呀？」記者再問他會否感尷尬？霆鋒說：「我完全唔會覺得有尷尬。」
採訪：李珮洳
攝影：陳偉權