直擊保時捷CarreraCupAsia賽事
郭富城作為一個著名嘅成功藝人，其一絲不苟嘅工作態度早已廣為人知；但估唔到當佢搖身一變成為賽車手時，一樣對自己有極高要求。今次城城（郭之暱稱）到馬來西亞，係以嘉賓身份參加一級方程式大賽嘅主要支援賽事──保時捷CarreraCupAsia第一回合比賽；雖然練習及排位賽中表現未如理想，但其堅毅不屈嘅精神，不但媲美專業車手，而且重值得我哋學習㖭！我哋嘅特派記者，遠赴馬來西亞Sepang賽車場，直擊城城作賽時嚴肅嘅一面；無論你係佢嘅Fans抑或係車迷，都不妨留意吓喇！
特約記者、攝影：利廣源
城城今次到馬來西亞，目的就係專誠參加保時捷CarreraCupAsia比賽，並以嘉賓車手嘅身份，出戰喺一級方程式大賽舉行前嘅支援賽事；在此之前，原來城城已經差唔多有兩年，無正式參加賽車活動喇！作為一名熱愛賽車嘅發燒友，難怪佢對今次參賽顯得非常認真同投入啦！
其實城城今次參戰，源於去年嘅澳門格蘭披治大賽車；因為當時舉行嘅雷諾方程式比賽，城城已經非常技癢，希望能夠落場一展身手，奈何當日剛啱要趕往馬來西亞演出，只能夠匆匆喺澳門擔任特別嘉賓，當時亦正好遇上香港保時捷代理（同時亦係雷諾代理）嘅負責人，談起2003年舉行嘅保時捷CarreraCupAsia大賽。按照保時捷嘅傳統，有一部以廠方名義出賽嘅戰車，喺每一個回合都會邀請不同嘅知名車手作嘉賓，駕駛呢部911GT3Cup戰車出賽；而身為亞洲區嘅著名歌手，又係一個業餘賽車手嘅郭富城，正好成為第一場嘉賓車手嘅理想人選，碰上此戰更係2003年一級方程式馬來西亞大賽嘅主要支援賽事，因此城城便即時答應參賽。
不過，今次保時捷CarreraCupAsia大賽正式參賽嘅車手，可謂高手雲集，包括有五屆東南亞房車賽冠軍嘅本港著名車手關兆昌、超級跑車賽專家艾邦（NigelAlbon）、有泰國車神之稱嘅拿達活（C.Nattavude）、南非保時捷賽冠軍雲達（TobyVenter），以及一批經常參加保時捷賽事嘅香港好手，城城要喺呢群車手中突圍而出，本已絕不容易，加上佢係第一次到馬來西亞嘅SepangF1賽車場作賽，賽前更只有兩節嘅練習時段，對佢嚟講的確係一項好大挑戰。
喺第一節不計時練習中，城城嘅911GT3Cup戰車因波箱出現問題，令佢未能跑完整個時段，損失咗寶貴嘅練習時間，圈速方面自然亦不大理想，城城明顯因而感到不快，睇住成績而面露不悅之色；不過，佢亦了解到自己對呢條跑道嘅認識未夠充份，喺某啲彎位仍揸唔定主意應該點跑，於是虛心地向圈速暫時最快嘅關兆昌請教，互相討論駕駛方法。關兆昌亦勸勉城城，表示自己早已熟習咗呢條跑道，加上全年都有比賽，圈速比城城快得多亦屬正常。
到咗3月22日嘅排位賽，城城駕駛已修理好嘅保時捷911GT3Cup戰車出場，目的係希望可做到比昨日快兩秒嘅圈速，經過一輪激烈角逐後，被譽為亞洲最成功車手之一嘅香港好手關兆昌，造出最快時間得到排頭位資格出賽。由於時值正午，跑道嘅溫度比昨日更高，城城不能盡情發揮，結果只能排喺第18位，圈速與關兆昌相差達七秒之多。
正式嘅十圈比賽於星期日（3月23日）舉行，城城今次集中精神，沿途緊隨在一列賽車之後，並伺機逐一超越；雖然佢排第18位起步，但表現穩健並逐漸加速，最後更以第12名返抵終點。對於呢個成績，城城已經相當滿意，而更令佢高興嘅，係能夠跑出咗2分22秒多嘅最快圈速，比排位賽時快咗三秒半，可說是超額完成咗佢自己嘅目標。而保時捷方面亦非常高興獲得城城嘅參與，而且重準備邀請佢參加多幾場比賽㖭！相信城城若答應參加更多賽事的話，其表現將會更好呢！
香港著名賽車手關兆昌，喺保時捷CarreraCupAsia嘅第一回賽事中險勝，僅以0.401秒之微擊敗來自英國嘅艾邦；繼1999年於馬來西亞一級方程式大賽支援賽事勝出後，再一次踏上F1頒獎台嘅最高位置。
排頭位出賽嘅關兆昌起步失利，因為其戰車嘅輪胎尚未完全熱身，令其位置下跌到第三位；但關兆昌喺賽事中不斷努力追趕，終在比賽嘅最後一圈，反領先對手兼率先衝過終點。艾邦喺賽事嘅早段拼得太盡，賽車嘅輪胎響第六圈開始磨損，關兆昌亦因此喺最後一圈有機可乘，而南非車手雲達於賽事中起步飛快，並一度響比賽中領先，可惜因為跟泰國車手拿達活嘅一次輕微碰撞而墮後，拿達活最終名列第三。