房地產業係本港經濟支柱，近年樓市唔多掂，大家都冇乜好日子過。樓市多人關心，亦出現形形色色嘅分析。中原地產研究部最近嘗試用房間數目嚟分析客源分布變化。
中原攞咗全港十個屋苑，今年首季同去年第四季嘅流通比率嚟分析，即係屋苑嘅成交量相對單位總數所得百分比，發現兩房單位如柴灣杏花邨同荔枝角美孚新邨錄得上升，其餘就不變或下跌。但係3房單位比去年第四季僅得3屋苑冇變動，其餘全部下跌。
中原嘅結論，係樓市由去年開始出現兩極化，3房二手單位流通比率下降，估計原因係啲換樓客去咗買一手新樓，流通比率就跟住下跌。至於啲兩房單位，買家一般係上車客、短線炒家或投資客，客源比較多元化，承接力冇咁弱。
究竟呢個結論對樓市有冇參考價值，蘭西唔係咁清楚，但有一樣就實啱嘅，唔理一二手，總之價錢平同超筍就一定有買家。
本港經濟喺接二連三打擊下元氣大傷，飲食業尤其慘重，大型食肆租賃個案勁減，不過，啲中小型食肆就積極入市租舖。
美聯物業工商舖營業董事黃子華講，細食肆佔整體租務成交比例，估計有機會由上季佔五成，上升到七成。點解呢類食肆咁掂？黃子華指出，因為佢哋喺舖租同人工呢兩瓣支出都冇大店咁多，有啲重係一家人經營，最多自己冇糧出，唔會欠人薪咁苦惱。
黃子華話，好似九龍城南角道44號地下同閣樓，地下千三呎，閣樓一千呎，由餐廳租咗，月租兩萬三。旺角上海街595號地下八百呎，一樓二千六百幾呎，月租四萬八，租客係茶餐廳。
非典型肺炎搞到香港滿城風雨，清潔屋苑已經成為管業公司嘅首要任務，佢哋除派口罩外，重派埋手套同消毒藥水洗手㖭，有啲喺門口再加多一塊浸咗消毒藥水嘅地氈。
講開屋邨清潔，早前多個地區嘅團體，都有搞屋苑清潔比賽，富城集團就話佢哋喺七個地區清潔比賽中，總共有十二個屋苑攞獎。呢七個地區係北區、沙田、葵青、黃大仙、深水埗、九龍城同南區。
攞到獎嘅屋苑如下，私人住宅有粉嶺綠悠軒同荔枝角美孚新邨，居屋苑有九個。至於工業樓有紅磡凱旋工商中心一至三期。
蘭西查過，到目前為止，呢十二個屋苑都冇出現非典型肺炎個案。睇嚟各區區議會等團體，第日都要搞多啲清潔比賽至得嘞。
下個禮拜就係復活節，商場大業主又要搞活動，吸引人流，恒基話由18號開始，本月嘅周六、日同假期，會喺旗下十四個商場搞「開心復活兔全接觸」活動，消費滿一百蚊或以上，可免費參加攤位遊戲，贏取獎品。其中上水中心商場重會喺21號舉行一場「ChocolateQ版時尚趣緻開心Show」時裝表演，請嚟Rosemary、江芷妮同藤麗名等一班名模同藝人，着住以朱古力做主題嘅服飾行catwalk，認真特別。
蘭西希望困擾本港嘅非典型肺炎，可以喺短期內受到控制，唔係到時個個都要戴住口罩參加活動，就冇咁過癮嘞。
本港正受病毒困擾，睇樓量大跌，好多人都覺得今個月樓市真係冇眼睇，但唔係個個都咁灰嘅，中原執行董事張奕威話，最重要係仍有交投，所以今個月都未必一定蝕梗㗎。
其實，𠵱家有啲業主睇唔好前景，想趁勢賣樓，亦有買家認為，非典型肺炎只係有短暫影響，係入貨好時機，有買有賣，又點算差呢？不過代理就要做多好多工夫至成到交易。當然，個價就一定要好吸引至得，即係會再創新低。
蘭西
電郵地址：
