皇家馬德里嘅捧場客前晚應該有種坐完過山車嘅感覺。估唔到隊波完場前五分鐘連入三球反勝華歷簡奴三比一。最激係當上盤客塊面黑足九十三分鐘，到九十四分鐘至睇到摩連迪斯埋齋開上盤。再諗吓前晚AC、華倫同埋巴塞等歐冠盃八強隊輸波輸盤，皇馬上盤客算執番身彩。
皇馬響球場上好波，但響博彩角度就正衰波，周不時整個贏波輸盤局比捧場客歎吓。𠵱家捧場客開心，真係要多謝摩連迪斯。呢個射手唔止踢出身價，原來比賽當日係佢二十七歲牛一。我求大俠代表數緊錢嘅捧場客，同埋我哋中咗三比一波膽嘅名家藍鑽石，補祝摩連迪斯生日快樂，嘿嘿……。
查實除咗捧皇馬嘅上盤客牙煙之外，前晚買咗祖雲達斯嘅一樣凶險。黑白兵團由下半場中段已經十個鬥八個，估唔到拖連奴都頂到去八十八分鐘至輸第二球。又一次證明，弱勢球隊響打吡戰往往憑鬥心踢高一皮波。
不過，祖記今場波有查斯古特同埋尼維特受傷，贏波代價認真唔細。
你話阿仙奴中場杜里唔生性又好，唔好彩又好，總之佢前日一個烏龍波，搞到阿仙奴被維拉迫和痛失兩分。我求大俠記得四年前韋華斯因為對列斯犯錯，令隊波最後攞唔到聯賽冠軍，從此無啖好食，重畀領隊雲格賣咗去國米㖭。你話一個唔覺意阿仙奴最後因為呢兩分攞唔到聯賽冠軍，領隊雲格肯定唔會放過杜里。
我哋無咩機會睇到嘅英甲聯比賽，最近戰況非常激烈，好似前日屈福特作客贏般尼七比四，咁嘅比數就算喺互射十二碼唔會有機會出現；另外，森林又作客贏葉士域治四比三，又係大比數。
當然，我唔建議大家吼七比四呢啲波膽，因為大莊根本無得賠。
列斯前日作客大勝查爾頓六個一皮，對於今季衰到貼地嘅佢哋嚟講，都算係代表作囉。或者有人問點解列斯突然咁勇？我求大俠就覺得係班波缺財，又冇成績，季尾唔大清貨至出奇。
時勢唔好，啲球員幾唔開心都想保住飯碗騎牛搵馬，𠵱家唔搏等幾時？