幾位議員噚日化身做「鯉魚門海鮮宣傳大使」，唔單止幫市道蕭條嘅海鮮檔做生招牌，張宇人重真金白銀拎咗六千幾蚊擺咗兩圍。
事緣肺炎爆發後，鯉魚門生意已經跌咗三成，後嚟政府將位於柴灣嘅「鯉魚門度假村」變為隔離中心，市民卻誤以為係九龍食海鮮嘅鯉魚門，所以個個都唔敢嚟，呢幾日好多酒家都食白果。
張宇人見佢哋咁慘，就自掏荷包請其他黨嘅老友食番餐，以示鯉魚門又乾淨，海鮮又好食。不過前綫嘅議員就冇到，民建聯為咗今日嘅競選拉票都冇出席。原來噚日重係民主黨李華明嘅舊曆生日，於是大家順便同佢慶祝埋，雖然俾人笑喺清明節生日，不過都一樣食得咁開心。
席間，劉千石重諗到絕世好句──「食海鮮抗肺炎」，咁都畀佢諗到，八方真係服咗佢。阿石喺佢食指大動之前，已經忍唔住要「郁手」，喺酒家度即席揮毫㖭。
噚晚確實非常好餸，尤其一條老鼠斑，「飛天朱」朱幼麟見到竟然有啲感慨咁話：「自從九七之後都冇食過老鼠斑啦！」壽星仔李華明即刻反問，唔通自老董上任後，搞到連老鼠斑都冇得食？搞到飛天朱浮現一副百詞莫辯嘅樣。
﹙圖﹚
傳真︰2623-9278
電郵︰