上個禮拜對好多散戶嚟講，一啲都唔盞，皆因外圍市升咗幾日，港股得個睇字，到咗星期五又無端端俾挾咗上去，搞到好多淡友累積咗一批空倉後，就嚟一個大挾倉行動。據市場行家講，淨係星期五嗰日，就有成三千幾張空倉要急於平倉離場。
另一隻被大戶舞高弄低嘅股份就係TCL（1070），隻股喺兩蚊跌落嚟之後，沽盤好似落雨咁密，喺買盤承接不繼下，TCL最低重見過個七樓下。不過有睇好隻股仔嘅朋友話，隻股仔可以留意，皆因上個星期已經有番啲大戶買盤出嚟，重話有機會返番上去2蚊邊。睇番TCL個圖表走勢，幾次跌到去個七就嚟一鋪大反彈，或者今次都有咁嘅機會。
好多人都話喺創業板啲股仔冇隻係好嘢，而且重成日要港交所孭鑊。不過依伏勝嚟睇，呢句話對部份創業板股份唔係咁公平，因為有好多隻股份其實都係禾稈冚珍珠，就好似上個禮拜復牌嘅樓蘭控股（8039）咁，以前因為淨係做國內嘅葡萄酒釀製同分銷生意，賺錢唔係多，尤其𠵱家啲人淨係識飲法國同埋智利名釀，識得品嘗國產「佳釀」嘅人真係少之又少。
不過喺上個禮拜，佢哋公布咗入股上海申虹糧油酒食品公司後，伏勝就覺得佢哋將會變得更精采，皆因佢哋除咗攞咗上海葡萄酒及啤酒嘅批發業務外，重會有好多隱形項目包括喺裏面，當中有唔少嘢係可以幫到公司𠵱家嘅業務。
申虹前身係國企，話晒一向由阿公湊大，同政府關係一定良好，有朋友話隻股仔喺咁嘅情況下應該重會有古仔跟尾，不過要升番上5毫樓上睇嚟都要落力啲。
伏勝