加斯居尼自從投身中國甲B聯賽之後，一直備受英國傳媒關注，尤其近期非典型肺炎肆虐中國就更加關心呢位過氣名將。不過，「肥仔嘜」就唔會因為病毒返國避難。
加斯居尼第一場替甘肅天馬上陣，即連扭過對方兩個守衞射入世界波，大演身價，佢嘅人氣亦開始帶旺球會，所以班主都驚加斯居尼會唔會因為非典型肺炎事件，寧願提早終止合約返家鄉，避免有生命危險。
據「肥仔嘜」經理人桑達斯講，加斯居尼會繼續履行同甘肅天馬嘅合約，唔會避開肺炎菌，重話甘肅位於北部，距離重災區廣東好遠，照計就唔會有事喎。佢咁講似乎真係唔多認識呢種菌厲害，天馬今日主場對碰廣東雄鷹，我求大俠即管睇吓加斯居尼會唔會出場比賽。
英超近季尾，紐卡素就急不及待推出印有全新贊助商標誌嘅○三至○五年度最新主場球衣，球迷可以喺網上訂購，五月初就有貨。我求大俠都好難怪紐記咁快推新波衫出嚟賣，今季又有好成績，擁躉實會捧場，況且七月又會到大馬踢熱身賽，早推出到時可以喺亞洲區搵一筆，醒！
梳打埠開嘅日本職業聯賽盤，經常出現大手交易，兩輪共十四場全部都有入球，且部份戰果認真驚人，好似橫濱水手上周大勝磐田山葉四比二，噚日古河市原作客大數大分三神四球，清水脈搏同大阪櫻花踢到五比四。我求大俠提醒波友，不妨留意大比數波膽。
前富咸領隊泰簡拿離隊前，我求大俠聽過睇過唔少報道，話隊中一班法國兵亦會齊齊走人，以報泰簡拿知遇之恩，義氣仔女咁款！但係呢啲義薄雲天情節，都係睇戲至有；中場馬白蘭基重話目前最重要嘅就係專心幫富咸打番好啲成績㖭，其他法國兵都冇邊個話真係想走，真係義氣博兒戲囉！
騎士今季戰績咁差，趕走唔少捧場客；今季就比上年少咗成四千人入場。不過騎士就好積極羅致超級新人勒邦占士，希望出年球季一鋪反底。
佢哋日前重叫啲球員打電話畀季票持有人，多謝佢哋之餘重話敬請密切留意騎士出年嘅重建喎。我求大俠就好欣賞佢哋呢招，真係贏唔到波都贏到口碑！
早排我求大俠同大家講過NBA強隊打甩髀爭較高排名，故可以放心捧場。唔知係咪梳打埠收到風，呢兩日將啲強隊嘅讓分大幅上調。好似近六場打足五場客仗嘅帝王作客塞爾特人要讓成六分，當人唔識打咁，咁讓法真係幾勁都唔掂，大家真係要識轉膊。